Според генералниот секретар на Алијансата за Албанците, партија која во коалиција со Алтернатива освои 12 мандати, не доаѓа во предвид коалиција со ДУИ. Сите други математики „до 61 пратеник“ се можни.
Алијансата на Албанците и Алтернатива ќе одржат протестен марш со порака „Доста е“, со цел да го изразат револтот против злоупотреба на гласовите и полнење на кутиите на изборите, најави генералниот секретар на АА , Арбен Таравари во отвореното студио на ТВ 24. Протестот ќе се одржи во понеделник и ќе почне од скопски Чаир, а предвидено е да заврши пред канцеларијата на ЕУ во Скопје и пред Државната изборна комисија.
„Пораката ќе биде доста е веќе со полнење на кутии. Оставете го народот сам да си гласа, да си ја изрази политичката определба и волја. Не ги злоупотребувајте гласовите и не гласајте по неколку пати“,
изјави Арбен Таравари, генерален секретар на АА.
Таравари обвини дека ДУИ направиле изборен инженеринг и дека најочигледен пример каде имало кражба на гласови и полнење кутии бил Зајас каде имало дури 80% излезност, а според нивни сознанија гласале и починати и отселени лица. Коалицијата АА/ А поднела повеќе тужби пред Управниот суд, но не очекуваат позитивен исход, затоа што меѓу судиите е и Субхи Јакупи, поранешен член на ДИК од ДУИ.
Во однос на преговорите за формирање Влада, Таравари рече дека за нив се отворени сите опции, но главен услов е ДУИ да не биде дел од парламенатрното мнозинство.
„Сите математики се можни. Се што прави 61, каде што ДУИ не е дел од Влада, ние сме тука. Мислиме дека и кај Албанците треба еднаш да се случи промена, после 18 години“,
објасни Таравари.