Министерката за надворешни работи на Јамајка, Камина Џонсон Смит, денеска деменатира дека нејзината земја го признала Косово.
„Јамајка не го признала Косово како независна држава“,
напиша Џонсон Смит на Твитер коментирајќи објава на косовскиот претседател Хашим Тачи од вчера, кој прв го објави признавањето.
„Извонредна вест! Штотуку ме информира амбасадорката (во САД) Вљора Читаку дека Јамајка ја призна Република Косово како суверена и независна држава. Знам дека ова е резултат на напорно и долгогодишно лобирање, во кое беше вклучен конгресменот Елиот Енгел. Добро сработено. Благодариме драги пријатели од Кингстон“,
напиша Тачи вчера на Твитер.
Косово прогласи независност на 17 февруари 2008 година, по што беше признаено од над 110 држави членки на Обединетите нации. По десетината повлекувања на признавањата од одредени африкански и островски држави, како резултат на лобирањето на српската дипломатија, ова е единственото ново признавање на косовската независност во последните неколку години.
Српската кампања за повлекување на признавањата на косовската независност беше една од главните причини за одлуката на претходната влада, во ноември 2018 година, за воведување такса од 100 отсто на увозот на српски производи, по што беше целосно прекинат дијалогот за нормализирање на односите меѓу двете држави.