Генералниот секретар на владата од 2013 година, Кирил Божиновски, ми рече земи ја книгата ,,Зоки Поки“ и читај. Слично како што постапи Талат Џафери кога се донесуваше Законот за бранители. Правете што ќе правите, но дневниот ред да не биде усвоен, рече денеска во своето сведочење за предметот „Насилство во Центар“, Томислав Лазаров, кој бил координатор на советничката група на ВМРО-ДПМНЕ во 2013 година во Општина Центар.
Лазаров беше еден од обвинетите во овој случај, но призна вина и доби условна казна од шест месеци затвор кои нема да се извршат ако во наредните две години не направи кривично дело.
Тој денеска сведочеше во случајот и кажа дека во тој период се договарал со Божиновски и со претставници од Здружението „Веритас“ да одржат мирни протести пред Општината за, според него, спорните точки за поништување на ДУП на општината, односно за одбрана на рушењето на црквата „Св. Константин и Елена“.
„На тие состаноци не се говореше за насилство, туку само за масовност на овие протести. На 7 јуни 2013 година, кога пристигнав во Советот, видов лица што немаат врска со Општина Центар, ми кажаа дека седницата е јавна и затоа се присутни. Во меѓувреме, стигнаа и други граѓани од Центар, но од службите не беа пуштени да присуствуваат. Имав насоки во правец на тоа да го убедиме мнозинството да ги тргне од дневен ред тие точки. Дискусијата да биде издржана и професионална. Покрај координацијата со советниците, пред усвојување на дневниот ред, имав координација преку телефон со Кирил Божиновски и Миле Јанакиески. Бараа да ги информирам за текот на настаните. Убедувањето и забелешките не знам колку траеја, мнозинството остана на ставот дека тој дневен ред треба да биде усвоен. Во меѓувреме, стигна и демонстрантите од ‘Веритас’, почна метеж и немаше услови за одржување на седницата. Во вечерните часови претседателот донесе одлука да се прекине седницата без усвојување на дневниот ред и седницата се одложи за 10 јуни 2013 година“,
истакна Лазаров.
По три дена, кога пристигнал на закажаната седница, вратата била заклучена, поради што бил приморан преку оградата да влезе во Општината, на што му посочил и на претседателот на Советот дека не може да дозволи да почнат без сите да присуствуваат. Тој се присети дека седницата продолжила со истите забелешки и дека со текот на времето се зголемиле и тензиите.
„Луѓето што протестираа се доближија до сала на Советот на Општина Центар. Немаше услови за работа. Претседателот само даваше паузи за масата да се смири и да се тргне од салата. Во опасност беа сите, вклучително и градоначалникот“,
рече Лазаров.
Во предметот обвинети се повеќе лица, меѓу кои поранешниот премиер Никола Груевски кој е во бегство во Унгарија, ексминистерот за транспорт и врски Миле Јанакиески, како и поранешната советничка од ВМРО-ДПМНЕ во Центар и актуелна пратеничка Даниела Рангелова и уште неколку други лица.