Претседателот на државата Стево Пендаровски попладнево, на свечена церемонија, го потпиша указот за прогласување на Законот за ратификација на Северноатлантскиот договор.
Откако знамето на НАТО вчера се развеа пред парламентот, денеска и во кабинетот на Пендаровски, покрај знамето на Северна Македонија, стои и знамето на Алијансата. Ратификацијата на Северноатлантскиот договор, сепак, ќе стапи во сила откако и парламентот на Шпанија ќе го ратификува Протоколот за нашето членство во НАТО. Очекувањата се дека целата процедура, која предвидува и депонирање на ратификацијата на Северноатлантскиот договор во Вашингтон, да заврши до средината на март, по што Северна Македонија и официјално ќе стане членка на НАТО, на церемонија што ќе се одржи во седиштето на организацијата во Брисел.