Судскиот совет денеска донесе одлука за работата на судовите во која наведува група предмети кои се итни и за кои препорача да се одржуваат рочиштата. И за останатите или неитните препорача да се одржуваат, но ако има услови за тоа.
Притоа, како што нагласува Судскиот совет, мерките против коронавирусот мора да се почитуваат.
„Претседателот на судот и судиите, менаџирањето со судските предмети да го усогласат со мерките и препораките на Владата и надлежните здравствени органи. Должни се да ги преземат сите мерки на претпазливост за да се намали ризикот од инфекција со вирусот ковид-19 на судиите, судската служба, странките и другите учесници во постапката“,
наведуваат од Судскиот совет.
Во групата предмети за кои е нужно да се одржуваат рочишта, Советот ги сместува оние во кои обвинети се во притвор, домашен притвор или имаат друга мерка, во кои некоја од странките не е наш државјанин, каде постои опасност од застарување на делото, кои се прекршочни од итна постапка, кои се однесуваат за примена на времени мерки, кои се пред пресуда, каде постои опасност од повреда на принципот за судење во разумен рок, кои по сила на закон се итни и прием на поднесоци што се врзани со законски преклузивни рокови.
Од јавно експонираните предмети за кои треба да се одржуваат рочишта се случајот „Рекет“ и предметот за организацијата на „27 април“, бидејќи Бојан Јовановски во првиот, а Миле Јанакиески, Спиро Ристовски и Владимир Атанасовски во вториот, се во притвор во затворот во Шутка, односно во домашен притвор. Тука се и случаите „Транспортер“ и „Титаник 3“, кои се пред изрекување пресуда.
Во предметите за кои нужно треба да се постапува, Судскиот совет ги наведува и оние што се однесуваат на кривични дела сторени во актуелната ситуација со коронавирусот, како што се: пренесување заразна болест, непостапување според здравствени прописи за време на епидемија, неукажување медицинска помош, спречување службено лице во вршење службена дејност, напад врз службеник при вршење работи на безбедност и организирање отпор.
„Закажаните расправи по предметите кои не се итни се одржуваат доколку се исполнети законските услови и доколку претседателот на судот и судиите проценат дека не се со висок ризик по здравјето на судиите, судската служба, странките и другите учесници во постапката“,
велат од Судскиот совет.
Претседателите на судовите и судиите, препорачуваат од ова тело, да ја разгледаат можноста за работа од дома, односно дома да проучуваат предмети, а да доаѓаат во судот кога ќе имаат судења.
Судскиот совет им наложи на судовите дека секој што влегува во судот треба да ги помине безбедносните здравствени проверки, да не се создава метеж на шалтерите и пред и по секое судење да се прави дезинфекција на судниците.