Здружението на судии побара од Судскиот совет и од Врховниот суд да преземат соодветни чекори за целосно почитување на владините мерки во однос на коронавирусот. По реакција на дел од подружниците, Управниот одбор на Здружението бара три конкретни активности:
1. Да се донесе одлука за одлагање на закажаните рочиштата;
2. Да се судат само итните и недоложни предмети;
3. За судиите кои ќе ги судат итните и неодложни предмети да се обезбедат соодветни мерки за заштита, согласно Протоколите утврдени од страна на Министерството за здравство и Владата на РСМ.
Во моментов, активни се две упатства за заштитни мерки од коронавирусот кои се однесуваат на судството.
Првото, се однесува на судот во Дебар, според кое за време на кризната состојба се извршуваат само нужните работи:
- Судења на кривични предмети кога обвинетиот е во притвор;
- Кривични предмети на странките кои не живеаат во Република Северна Македонија а се затекнати во Општина Дебар и Центар Жупа;
- Кривични предмети за крвичните дела „Пренесување заразна болест“ по член 205 од КЗ, „ Непостапување според здравствени прописи за време на епидемија“ по член 206 од КЗ, „Несовесно лекување болни“ по член 207 од КЗ, „Неукажување медицинска помош“ по член 208 од КЗ, „Спречување службено лице во вршење службено дејство“ по член 382 од КЗ, „Напад врз службено лице при вршење работи на безбедноста“ по член 383 од КЗ, „Организирање отпор“ по член 387 од КЗ;
- Предмети за примена на времени мерки;
- Прекршочни предмети од итна природа;
Второто се однесува на територијата на остатокот од државата, со кое практично само се редуцираше јавноста на судењата од висок профил.
„Сите судења за кои постојат законски услови треба да продолжат. Се препорачува оние судења за кои има масовен јавен интерес да продолжат со редуциран број на физичко присуство на јавноста за кои треба да се овозможи алтернативен начин за следење на судењето покрај физичкото присуство. Се препорачува искористување на просториите во кои има физичко одделување на учесниците во постапката и јавноста, како и користење други можности за информирање, како видеопренос и слично“,
соопштија на 12 март 2020 година.