Истражувањето спроведено на 32 000 доброволци покажало дека вакцината е стопроцентно ефикасна во спречување на тешки форми на ковид и е сосема безбедна за употреба
Вакцината на Универзитетот во Оксфорд и „Астра Зенека“ има ефикасност од 79 проценти во спречување на ковид-19, покажаа резултатите од студијата во САД, Чиле и Перу, соопшти компанијата која поднесе барање за одобрување на нејзината вакцина во САД.
Истражувањето спроведено на 32 000 доброволци покажало дека вакцината е стопроцентно ефикасна во спречување на тешки форми на ковид и е сосема безбедна за употреба, објави Гласот на Америка повикувајќи се на податоците што ги објави компанијата.
Новите податоци може да придонесе во намалување на загриженоста предизвикана од обвинувањата дека вакцината „Астра Зенека“ предизвикува згрутчување на крвта и дека не е безбедна за употреба, што подоцна беше демантирано од Светската здравствена организација и Европската агенција за лекови.
Многубројни европски земји прво престанаа да ја користат вакцината, а потоа повторно почнаа да ја користат. Со цел да се врати довербата на јавноста во вакцината, некои лидери, како британскиот премиер Борис Џонсон, се вакцинираа токму со неа.
„Астра Зенека“ објави дека независна комисија во Соединетите Држави повторно ќе ги испита наводите за појава на згрутчување на крвта по вакцината.
Од компанијата со седиште во Лондон веќе објавија дека истрагата што сами ја спровеле врз 21 583 учесници кои примиле барем една доза од вакцината, утврдиле дека не постои ризик од тромбоза.
„Астра Зенека“ во САД чека на одобрување од Администрацијата за храна и лекови (ФДА), што ќе трае неколку недели.