Стручниот надзор на Лекарската комора спроведен за гинекологот и директор на струшката болница доктор Мухамед Асани покажал дека немало пропуст во лекарската интервенција кога на родилката Веапоска Јалдз ѝ биле отстранети матката, бубрегот и јајникот.
Министерот за здравство Венко Филипче во гостувањето во емисијата „Утрински брифинг“ на „Слободна ТВ“ ја потврди ваквата информација.
„Стигна извештајот од Лекарска комора, не нашле пропуст во стручниот надзор“,
рече Филипче.
Кај истиот гинеколог, во јануари Државниот санитарен и здравствен инспекторат (ДСЗИ) откри и домашна дива ординација за гинекологија. Тој случај, пак, во моментов е во рацете на струшкото обвинителството.
Од контролата која се спроведе беше утврдено дека директорот гинеколог дома има комплетно опремена гинеколошка ординација која не е регистрирана, нема дозвола за работа ниту документи за основање фирма. За случајот до ДСЗИ имаше пристигнато и четири изјави од пациентки заверени на нотар, кои потврдуваат дека докторот во ординацијата сместена во неговиот дом им вршел прегледи по 15 часот. Една од пациентките во изјавата посочува дека во истата ординација докторот ја контролирал нејзината бременост уште пред осум години.
Во февруари, пак, исто така во Струга беше откриена уште една домашна дива ординација кај вработена во струшката Општа болница.