Од ДСЗИ велат дека инспекциската постапка сѐ уште е во тек и по комплетирањето на севкупната документација ДСЗИ ќе ги преземе сите мерки согласно надлежностите на Инспекторатот
Државниот санитарен и здравствен инспекторат ќе ѝ издаде решение за забрана за работа на специјалистичка ординација по гинекологија и акушерство во Струга, лоцирана на кејот „8 Ноември“ и ќе бара одземање на дозвола за работа, соопшти денеска ДСЗИ.
Од Инспекторатот велат дека од вонредниот надзор е утврдено дека ординацијата не ги исполнува условите за вршење дејност.
Во соопштението од ДСЗИ се наведува дека контролата е направена по сознанија дека во тој објект има ординација за гинекологија и акушерство. Два часа инспекторите не биле пуштани да влезат внатре во објектот на кој немало никакво обележување дека е ординација, а кога влегле затекнале простор од 25 м2 и опрема за гинекологија и акушерство, што според ДСЗИ укажува дека тука се вршела таква дејност.
Просторијата е во сопственост на д-р З.П.Ш. доктор специјалист по гинекологија и акушерство, вработена во Општата болница во Струга. При надзорот, приложен е Договор за отстапување на користење на простор ( 01/2021 година) каде што стои дека просторијата се издава на времено користење на ПЗУ „Д-р Благоја Парталоски“, која има решение издадено од Министерството за здравство од 1999 година, дека исполнува услови (простор, опрема и кадар) за вршење на специјалистичко-гинеколошко акушерска дејност на гореспоменатата адреса, но во моментот нема носител на дејност, бидејќи д-р Парталоски е во пензија од 2009 година.
Од ДСЗИ велат дека инспекциската постапка сѐ уште е во тек и по комплетирањето на севкупната документација ДСЗИ ќе ги преземе сите мерки согласно надлежностите на Инспекторатот.
Колку диви ординации „оперираат“ во Струга?
Ова не е прв ваков случај во Струга.
Минатиот месец беше откриена домашна ординација на директорот на струшката болница Мухамед Асани, во која тој прегледувал пациентки. Беше утврдено дека директорот гинеколог дома има комплетно опремена гинеколошка ординација која не е регистрирана, нема дозвола за работа ниту документи за основање фирма. За случајот до ДСЗИ имаше пристигнато и четири изјави од пациентки заверени на нотар, кои потврдуваат дека докторот во ординацијата сместена во неговиот дом им вршел прегледи по 15 часот. Една од пациентките во изјавата посочува дека во истата ординација докторот ја контролирал нејзината бременост уште пред осум години.
За предметот беше поведена иницијатива до обвинителството, а директорот беше повикан на разговор во Владата, но досега нема информации дека е разрешен.