Во болницата во Струмица се исполнети сите сместувачки капацитети за пациентите со ковид-19, а место нема ниту во оние кои дополнително беа отворени.
Како што вели директорот на болницата, д-р Наќе Гогов, во Инфективното одделение се лекуваат 15 пациенти со полесна клиничка слика, а во дополнителниот дел отворен во поранашените хируршки амбуланти, хоспитализирани се 13 пациенти.
„Планираме да ги прошириме капацитетите со поставување на уште шест-седум кревети во другите амбуланти, кои се веднаш до хируршките. Но, засега најголем проблем ни е персоналот и тоа како лекари, така и сестри. Ги немаме доволно за да ја покриваат работата во овој оддел на Инфективното одделение“,
вели директорот Гогов.
Тој вчера побарал помош од заменик-министерот за здравство за обезбедување персонал за да се пополнат празните места за да може да се лекуваат ковид-пациентите.
„Со постојниот персонал повеќе не можеме и неиздржливо е да се постигне потребниот обем на работа. Веќе од среда очекувам да ни биде испратен дополнителен персонал за да може да се покрие и новиот простор што треба да се отвори за сместување на пациенти“,
вели д-р Гогов.
Инаку, проблемот добива уште повеќе на тежина, бидејќи двајца лекари, три медицински сестри и двајца административци од струмичката болница се позитивни на ковид-19 и се во домашна изолација.
Во моментов во Струмица се активни вкупно 264 случаи со ковид-19, а вкупно од почетокот на епидмеијата се регистрирани 428.