Инцидентот се случил на 19 мај 2014 година, кога тужителите Роми биле на возраст од шеснаесет и тринаесет години
Македонската Влада на Ромите, кои се сега на возраст од 23 и 19 години, треба да им исплати износ од по 7 500 евра
Европскиот суд за човекови права (ЕСЧП) пресуди во корист на двајца тужители, Роми, кои се застапувани од страна на Европскиот центар за права на Ромите (ЕЦПР), кои биле малтретирани додека биле малолетни,од страна на полицијата во Скопје во 2014 година.
Како што соопшти ЕЦПР, судот пресудил врз основа на недостатоци во истрагата, но не судел за нечовечкиот и деградирачки третман, со кој се соочиле тужителите (член 3 од Конвенцијата), ниту поради дејствијата на јавниот обвинител или на полициските службеници кои биле дискриминирачки (член 14 од Конвенцијата).
„Судот ѝ наложи на македонската Влада на Ромите, кои се сега на возраст од 23 и 19 години, да им исплати износ од по 7 500 евра,
соопшти ЕЦПР.
„Вие Циганите лажете и крадете“
Инцидентот се случил на 19 мај 2014 година, кога тужителите Роми биле на возраст од шеснаесет и тринаесет години.
„Полициските службеници, припадници на единицата ‘Алфа’, барале двајца силеџии, кои биле пријавени дека нападнале и ограбиле дваесетгодишна жена во близината, кои биле опишани како мажи со темен тен, на возраст помеѓу шеснаесет и осумнаесет години. Полициска патрола ги воочила двајцата малолетници, веднаш ги нападнала на улица, а потоа шеснаесетгодишникот го однеле во полициски притвор, каде што наводно бил тепан неколку часа. Кога во полициската станица Центар дошол неговиот татко, на момчето му било кажано: ‘Најди ја чантата или ќе те убијам пред татко ти.’ Под закана, момчето потпишало признание за кражба на чанта од дваесетгодишна девојка. Тринаесетгодишното момче изјавило дека полициските службеници му удирале шлаканици и викале по улицата: ‘Вие Циганите лажете и крадете!’“,
се наведува во соопштението од ЕЦПР.
По инцидентот, полицискиот инспекторат негирал каков било наводен престап сторен од страна на службениците, изјавувајќи дека полициските службеници не ги пречекориле своите овластувања.
Според претседателот на ЕЦПР, Ѓорѓе Јовановиќ, вознемирувачки е да се види дека правдата за овие деца очигледно не може да се добие во државата.
„Познато ни е дека овој вид расистичко насилство се случува постојано, но правосудниот систем, полицијата, јавниот обвинител во оваа држава се така институционално расистички, што, дури и кога деца се апсени и претепувани од страна на расистички полицајци, институциите не можат ниту да спроведат успешна истрага против сопствените службеници. Ромите треба да бараат поткрепа од судот во Стразбур за да добијат каква било правда“,
вели Јовановиќ.