Утре лидерите на НАТО ќе започнат разговори за конкретни мерки за зајакнување на безбедноста на подолг рок, најави генералниот секретар на НАТО
Генералниот секретар на НАТО, Јенс Столтенберг, денеска беше дециден дека Алијансата директно воено ќе се вклучи само ако Русија нападне една од нејзините 30 членки, а Украина не е тоа.
„Нашата одговорност како сојуз е да ги заштитиме и одбраниме сите сојузници. Испраќаме јасна порака дека сме подготвени да го сториме тоа, истовремено зголемувајќи го нашето присуство во источниот дел на нашата алијанса“,
рече Столтенберг.
Утре лидерите на НАТО ќе започнат разговори за конкретни мерки за зајакнување на безбедноста на подолг рок, рече Столтенберг, а на копно овие мерки би можеле да вклучат „значително повеќе сили“ во источниот дел на Алијансата во, како што рече, повисока состојба на подготвеност.
„Ние, исто така, ќе разгледаме зголемувања на нашите поморски и воздушни распоредувања, зајакнување на ракетната и воздушната одбрана и, исто така, зголемување на сајбер одбраната“,
рече тој.
Столтенберг посочува дека зајакнувањето на одбраната во Алијансата ќе бара дополнителни финансии и тој ги поздрави потезите на Германија и другите сојузници на НАТО во оваа насока.
Шефот на НАТО рече дека руската инвазија на Украина создаде „нова безбедносна реалност“ во Европа, а воената позиција на НАТО мора да биде подготвена за оваа нова реалност.
Тој, исто така, укажа на поддршката што членовите на одбранбената воена алијанса и ја дадоа на армијата на Украина во последните години додавајќи дека украинската војска е „поголема, посилна, подобро опремена и подобро обучена отколку во 2014 година“ како резултат на таа помош.
Столтенберг попладнево предупреди секаква употреба на хемиско оружје значи нарушување на повелбата за забрана на хемиско оружје, потпишана од Русија и ја повика Москва да не го користи и да ги повлече своите сили, и посебно хемиското оружје.
Тој напомена дека во минатото е документирана употребата на биолошко оружје од страна на Русија на странска територија против политички опозиционери, како и помош за хемиски напади во Сирија во повеќе наврати, ова рече тој е еднакво на воено злосторство, и не ја исклучи можноста од “лажна операција“ од страна на Русија.
Дали во ова сценарио НАТО ќе се инволвира во украинскиот конфликт, Столтенберг не одговори позитивно, но нагласи дека НАТО ќе стори сѐ за да ги заштити и одбрани земјите членки на Алијансата. Украина, се разбира, не е членка на НАТО.