Генералниот секретар на НАТО, Јенс Столтенберг, испратил известување до македонските власти дека сите земји сојузнички во НАТО завршиле со ратификацијата на Протоколот за нашето членство и дека сега ние треба да го испратиме нашиот ратификациски документ.
„Денеска, пристапуваме кон испраќање на нашиот документ за ратификација за Вашингтон. Следната недела тој ќе биде предаден во Вашингтон и со тоа Република Северна Македонија ќе стане 30-та земја членка на НАТО. Ова се големи историски моменти. Исполнета е важна стратегиска цел за стабилноста на државата и за безбедноста на сите граѓани“,
напиша Спасовски на Фејсбук.
Ова е последниот чекор до членството. Пред да биде испратен во Вашингот, потпис на овој инструмент ќе стави и претседателот Стево Пендаровски.
„Денеска ќе го потпишам Инструментот за пристапување на Република Северна Македонија кон Северноатлансткиот Договор, претходно парафиран од министерот за надворешни работи, Никола Димитров“,
објави претседателот на својот официјален профил на Фејсбук.
Тој наведува дека потпишувањето на инструментот е финалниот чекор за членството во НАТО.
„Во вонредни околности ја реализираме една од двете најважни стратешки цели на државата – полноправно членство во најголемата воено-политичка организација на светот“,
додава претседателот Пендаровски во објавата на Фејсбук.
Шпанија беше последната земја која во вторникот го ратификуваше Пристапниот протокол. Истиот ден и кралот на Шпанија Фелипе VI го потпиша ратификацискиот инструмент.
Вчера, пак, шпанскиот амбасадор во САД, Сантијаго Кабанас, истиот документ го предаде во Стејт департментот, по што следуваше известувањето испратено од Столтенберг до македонските власти.