Според неофицијалните информации на „360 степени“, пратеникот кој е по потекло од Струга има пријавено живеалиште во Скопје, но на друга улица, различна од адресата на неговиот татко каде е правен претрес
ВМРО-ДПМНЕ на прес-конференција ова утрово ја обвини власта дека врши притисоци врз опозициски пратеници откако Финансиската полиција во координација со Основното јавно обвинителство (ОЈО) Скопје спроведе претреси на повеќе локации, меѓу кои и во домот на родителите на пратеникот Јован Јаулески.
„Токму на денот кога се гласа недоверба на владата, режимот на Зоран Заев прави притисок врз опозициски пратеници и пушта полиција за претрес во домот на пратеникот којшто престојува со своите родители! Токму во очи на гласањето, финансиска полиција влегува во домот на родителите на Јован Јаулески, дом во којшто и тој престојува, во 5 часот наутро да врши претрес, да вознемирува, одзема телефони и што ли уште не! Притисокот, полициска бруталност, судски налози, ливчиња и политички нарачани налози за дом на пратеник токму денеска кога се гласа недоверба на владата на овој режим на Зоран Заев! Влетува финансиска полиција на Арафат Муарем, партиски војник којшто одработуваше и за време на изборите во корист на режимот“,
обвини на прес-конференција портпаролот на ВМРО-ДПМНЕ, Наум Стоилковски.
Тој го коментираше и тоа што од Управата посочија дека целта не е пратеникот туку неговиот родител, па додаде дека тој не е приватен стопанственик ниту е трговец поединец.
И пратеникот Јаулески во првичната објава на социјалните мрежи напиша дека Финансиската полиција упаднала во неговиот дом, но од Финансиска, пак, потоа демантираа.
„Целосно ги демантираме и отфрламе изјавите на пратеникот Јован Јаулески дека претресот е извршен кај него дома ниту, пак, кај некој друг претставник на политичка партија. Предистражната постапка се однесува на вработени во ’ЕВН електрани‘ ДООЕЛ и ’ЕВН Македонија‘ АД Скопје“,
соопштија од финансиската полиција.
Според неофицијалните информации на „360 степени“, пратеникот кој е по потекло од Струга има пријавено живеалиште во Скопје, но на друга улица, различна од адресата на неговиот татко каде е правен претрес.
Покрај во домот на таткото на Јаулески, претреси се прават кај повеќе лица во Скопје и Делчево. Станува збор за активности во рамки на предистрага отворена поради сомнение за извршени сомнителни трансакции на пари помеѓу ЕВН и повеќе физички лица.