Портпаролот на ВМРО-ДПМНЕ, Наум Стоилковски, го повика премиерот Зоран Заев, Владата и Јавното обвинителство да одговорат дали се точни пишувањата во медеиумите за нови лица инволвирани во аферата „Рекет“. Според Стоилковски, сега е јасно дека оваа афера не застанува на тројцата обвинети. Како што изјави тој денеска вистинските лица кои стојат зад оваа афера допрва треба да се откријат.
„Точно ли е дека „Професорот“ вклучен во рекетарската мрежа е доскорешен кандидат за претседател на државата, долгогодишен професор на правниот факултет „Јустинијан Прима“ во Скопје, лустриран за соработка со службите? Точно ли е дека „Советникот од странство“ вклучен во рекетарската мрежа, е еден балкански мешетар, со искуство во енергетиката, кој што Зоран Заев го довлечка од Белград во македонската влада, а за кого што балканските политичари го предупредуваа Заев?“,
прашува Стоилковски.
Понатаму тој продолжува:
„Точно ли е дека „новинарот“ вклучен во рекетарската мрежа, а за кој што пишува Героски, е самопрогласен бард на македонското новинарство на браникот на рекетарската 1ТВ, единствен поранешен директор на Јавниот сервис со средно образование, единствен новинар со безбедносен сертификат, издаден за да има увид во досиејата на потенцијалните рекетирани? Точно ли е дека „соработничката“, „носител на акцијата“ во рекетарската мрежа, блиска соработничка на Заев од врвот на СДСМ, е истата заради која што се измисли позиција заменик – претседател на партијата СДСМ, и има подарени чевли од Боки13? Точно ли е дека човекот „од најголема доверба“ вклучен во рекетарската мрежа, за кого што Героски пишува дека „без него не може да се стокми ниту еден бизнис во земјата“, „без аванс од извесна сума евра“, е истиот човек за кого што Заев вели дека седнува со министри, како министерот за здравство, за да „помага на луѓе“?“,
прашува Стоилковски.
Тој порача дека Обвинителството мора да биде транспарентно и да ги открие сите релевантни информации.
„Оваа исплетена рекетарска мрежа, води до главата на октоподот, до шефот на државната мафија. „Рекет“ е производ и носечки столб на владеењето на Зоран Заев и на неговата влада. Заев замина. Се погласни се посочувањата за владеење со закани по живот. Обвинителството не смее да сокрива информации или да остава време за осомничените да го продолжат делото, да влијаат врз сведоци, или да избегаат!“,
посочуваат од ВМРО-ДПМНЕ.