Фирмата ХАНТОНОС е отворена јануари 2022 година од Васе Панајотов од струмички Секирник, а продадена на 25.11.2022 година на Агим Имери од Косовска Митровица, којшто го менува името во ХАНТ ОСОЈ со ново седиште во Скопје. И оваа нова фирма ХАНТОНОС за кусо време тргува, увезува роба за 57 милиони евра, а никој не прашува од каде парите, и за тоа користи поврат на ДДВ од над 10 милиони евра, велат од ВМРО-ДПМНЕ
Портпаролот на ВМРО-ДПМНЕ, Наум Стоилковски, денеска на прес-конференција сподели документи според кои, како што вели, директорката на Управата за јавни приходи, Сања Лукаревска не ја говори вистината дека спречиле злоупотреби преку поврат на ДДВ.
Обвинувањата на релација ВМРО-ДПМНЕ и УЈП продолжуваат и денеска, откако вчера Стоилковски презентираше дека УЈП на фирма АКТИКО, која потоа била продадена со сменето име ОКИТНА искористила поврат од 11 милиони евра, а потоа УЈП откри дека воопшто нема деловни книги до кои може да се дојде, а газдата на фирмата воопшто не постоел.
На ова следуваше демант од страна на УЈП во кој тие кажаа дека биле извршени сите контроли и од нивна страна биле преземени сите постапки, а дополнително, обврзниците доставиле даночни пријави со даночно побарување оставени за идни периоди, а не за барања за поврат, како што кажа Стоилковски.
Но денеска Стоилковски одговори на демантот, велејќи дека ОКИТНА не е фирма за нафтени деривати, туку со дејност Трговија на големо со текстил и тоа го пишува во документ токму од УЈП. Второ, ОКИТНА не должи неплатен данок, туку напросто кажано УЈП си ги бара парите назад затоа што УЈП овозможило поврат на ДДВ преку криминален начин. И тоа повратот на ДДВ е даден додека фирмата не била продадена и додека не го сменила името
„Ќе цитирам документ од УЈП, ‘Е констатирано дека даночниот обврзник КОРИСТЕЛ право на одбивка на данок’. Значи, уште еднаш, Лукаревска или не знае или намерно не ја говори вистината. И затоа денеска Лукаревска нека одговори, од кого мисли да наплати 11 милиони евра од ОКИТНА кога сопственикот на којшто му е даден поврат на ДДВ ја продава фирмата на државјанин на Косово, а тоа лице едноставно не постои, не бил во Македонија воопшто?“,
вели Стоилковски.
Кога станува збор за повратот од речиси 11 милиони евра, портпаролот на ВМРО-ДПМНЕ вели дека фирмата ХАНТОНОС е отворена во јануари 2022 година од Васе Панајотов од струмички Секирник, а продадена на 25 ноември 2022 година на Агим Имери од Косовска Митровица, којшто го менува името во ХАНТ ОСОЈ со ново седиште во Скопје. И оваа нова фирма ХАНТОНОС за кусо време тргува, увезува роба за 57 милиони евра, а никој не прашува од каде парите, и за тоа користи поврат на ДДВ од над 10 милиони евра. Потоа, продадена, како ХАНТ ОСОЈ до март 2023 година тргува за 7 милиони евра и побарува 1,2 милиони евра. И во овие година дена има една специфична набавка, пријавен увоз од странство за 5,4 милиони евра и користи поврат од 820 000 евра.
„Кога доаѓа време за наплата на данок во 2023 година, УЈП сфаќа дека фирмата не плаќа, за потоа да не успее да го најде сопственикот, за којшто МВР ѝ посочува дека лицето Агим Имери од Косовска Митровица на кого му е продадена фирмата воопшто немал влез во Македонија во периодот кога наводно ја купил и работел со фирмата. И УЈП потоа разбира дека нема деловни книги, нема сметководство, а фирмата должи данок. Вкупно што УЈП сега бара е 12 милиони 226 илјади евра, односно, всушност парите кои се дадени како ослободување од ДДВ“,
рече Стоилковски.
Дополнително, сега, фирмата била ставена на листата должници од страна на УЈП, па затоа Стоилковски ги прозва Лукаревска и управата да одговорат од кого ќе наплатат 12,2 милиони евра, колку што ѝ дале поврат на ДДВ, кога сопственикот го нема, не постои, а воопшто не ни влегол во Македонија за да ја раководи фирмата или, пак, да ја купи.
„Васе Панајотов ја продал фирмата, Агим Имери не влегол во Македонија? Како ќе наплати Лукаревска 12,2 милиони евра криминален поврат на ДДВ, ако сопственикот на ХАНТОНОС не постои?“,
прашува Стоилковски.