Силниот ветер кој синоќа дуваше во главниот град откорнал големи парчиња стиропор од фасадата на АД МЕПСО. Фотографиите од нередот што бил направен во и околу објектот ги сподели градоначалникот на Скопје, Петре Шилегов.
„Освен што е криминален, кичерајски, болноумен и слично, проектот Скопје 2014 е и небезбеден за животите на луѓето“, пишува тој на својот фејсбук-профил.
Тој најавува дека веднаш по изборите градските власти ќе мора да се зафатат со конечно решавање на проблемот до „Скопје 2014“.
„Причина повеќе за оние што се сомневаа (за жал ги има, од сите политички провиниенции) дали треба да се реши ‘Скопје 2014’. Да се разбереме. ‘Скопје 2014’ мора да се реши. Сега и веднаш. Најбрутално. На истиот начин на кој го силуваа нашиот град. Почнуваме после изборите. И да!!! Конечно да (ќе) има одговорност за ова лудило“, вели скопскиот градоначалник.
Фасадата на МЕПСО со столбови во антички стил и нов покрив чинеше 11 милиони евра. Изведувач на фасадата беше „Бетон Штип“, а автор на проектот „Неимар инженеринг Скопје“.