Со оглед дека во едногодишната казна се пресметуваат околу пет месеци поминати во куќен притвор, на Јакимовски му остануваат за издржување уште околу седум месеци затворска казна во Казнено-поправната установа во Шуто Оризари
Поранешниот градоначалник на Општина Карпош, Стевчо Јакимовски, на 2 јули годинава треба да се јави во затворот во Шутка на издржување на едногодишната казна затвор, информираа денеска од Основниот кривичен суд. Оттаму велат дека на Јакимовски денеска му бил издаден упатниот акт.
„Судија за извршување на санкции од Кривичниот суд Скопје, на осудениот С. Ј. му издаде упатен акт за издржување на едногодишната казна затвор и истиот е упатен да се јави во затвор ’Скопје’ на 2 јули 2026 година“,
информираат од Кривичен.
Ова следува откако Апелацискиот суд ја потврди едногодишната затворска казна за Јакимовски, во предметот поврзан со изградбата на општинската зграда во Карпош.
Во изречената казна ќе му биде пресметано и времето поминато во куќен притвор во периодот од 19 март до 15 август 2019 година.
Со оглед дека во казната се пресметуваат околу пет месеци поминати во куќен притвор, на Јакимовски му остануваат за издржување уште околу седум месеци затворска казна во Казнено-поправната установа во Шуто Оризари.
Основниот кривичен суд Скопје во април минатата година му досуди казна затвор од три и пол години на градоначалникот на Општина Карпош, Стевчо Јакимовски, во врска со градењето на административната зграда на Општината.
Кривичен го осуди Јакимовски за две дела – бесправно градење и злоупотреба на службената положба. За бесправната изградба на општинскиот објект Судот му изрече казна затвор од една година, а за злоупотреба на службената положба и овластување затворска казна од три години.
Но, Апелацискиот суд ја уважи жалбата на Јакимовски во делот што се однесува на обвинението за злоупотреба на службената положба и овластување, поради што предметот во тој сегмент се враќа на повторно судење. Укинатиот дел од предметот, велат од Кривичен, ќе биде распределен кај нов судија, бидејќи тој што досега постапувал веќе не е распореден во Одделот за организиран криминал и корупција.
По пресудата од Апелација, Јакимовски на прес-конференција рече дека е осуден од политички причини, за да не може да се кандидира на евентуални повторени избори за градоначалник на Општина Карпош.
Јакимовски рече дека од овој момент е член на клубот на политички осудени лица.
Пресудата тој ја доведе во врска со случувањата со актуелниот градоначалник на Карпош, Сотир Лукровски, кој подолг период е на боледување, поради што назначи свој заменик од редовите на советниците во Општината. Според ексградоначникот, тоа е вистинската причина за судската пресуда, додека наводите од обвинението поради кои се гонел во постапката ги означи како повод за негов прогон.
Тој кажа дека во моментов нему и на неговата одбрана не им преостанува ништо друго освен да се надеваат на последната судска инстанца – Врховниот суд.