Пресудата тој ја доведе во врска со случувањата со актуелниот градоначалник на Карпош, Сотир Лукровски, кој подолг период е на боледување, поради што назначи свој заменик од редовите на советниците во Општината. Според ексградоначникот, тоа е вистинската причина за судската пресуд, додека наводите од обвинението поради кои се гонел во постапката ги означи како повод за негов прогон
„Илјадници години наназад важи една максима, една изрека: ‘Кој си игра со меч, од меч ќе загине’, односно: ‘Со каква мерка мериш, со таква мерка утре ќе ти мерат’, беше пораката што тој ја упати до премиерот Христијан Мицкоски, откако претходно изјави дека власта ги користи највиталните институции – обвинителството и судот во справувањето со своите политички противници
Ексградоначалникот на Карпош, Стевчо Јакимовски најави дека конечна одлука во врска со случајот ќе бараат од Врховниот суд, со надеж дека тој, како што кажа, ќе заземе правилен став и ќе ги отстрани недостатоците од, според него, политичката пресуда
Осуден сум од политички причини, за да не можам да се кандидиран на евентуални повторени избори за градоначалник на општина Карпош. Вака поранешниот градоначалник на оваа скопска општина попладнево во изјава за медиумите ја искоментира пресудата на Апелацискиот суд Скопје, со која е потврдена едногодишната затворска казна за Јакимовски за предметот поврзан со изградбата на општинската зграда во Карпош.
Скопска Апелација со мериторна одлука ја потврди пресудата што претходно ја изрече Основниот кривичен суд Скопје за кривичното дело бесправно градење, а за кое на Јакимовски му беше изречена казна затвор во траење од една година.
Обраќајќи се пред новинарите, Јакимовски рече дека од овој момент е член на клубот на политички осудени лица.
Пресудата тој ја доведе во врска со случувањата со актуелниот градоначалник на Карпош, Сотир Лукровски, кој подолг период е на боледување, поради што назначи свој заменик од редовите на советниците во Општината. Според ексградоначникот, тоа е вистинската причина за судската пресуд, додека наводите од обвинението поради кои се гонел во постапката ги означи како повод за негов прогон.
„Осуден сум политички, не затоа што сум направил кривично дело и затоа што сум ја злоупотребил својата положба и овластување, осуден сум затоа што власта, овој диктаторски режим си постави во Карпош тотално неспособен градоначалник кој четири месеци буквално блешее низ прозорецот на својот кабинет, пушејќи во него и потоа земајќи боледување, коешто е лажно и оттогаш наваму му се губи трагот. Значи тоа е причината, а поводот кој што е искористен е оваа и таа друга барака 1 и 2 кои се изградени, односно се поставени овде во кругот на Основното училиште „Лазо Трповски“. Значи поводот е поставувањето на овие две бараки за кои недостасува само едно ливче, а тоа е дека имаме дозвола за поставување на времен објект“,
рече Јакимовски.
Осврнувајќи се на објектите, тој кажа, дека тој и неговата одбрана цело во судската постапка докажувале дека станува збор за времен објект од гипскартон и челична конструкција, кој може да се извади и да се пренесе на друго место, но судот донел пресуда како да станува збор за цврста градба.
Притоа ексградоначалникот на Карпош обвини дека во постапката се користеле два фалсификати, за што, додаде, ангажирале вештаци, на кои не им било дадено да извршат вештачење на овие документи и да утврдат кој ги направил.
„Она што сакам да го знаете е дека за ова што ме товарат имаат исто така два фалсификата за коишто го известив и судот, за коишто употребивме и вештаци, форензирачи итн., на кои треба да знаете дека не им го дадоа предметот за да можат да го вештачат и точно да утврдат кој ги направил тие два фалсификати, кои се обидуваат да ги искористат за да ја донесат оваа пресуда. Но, очигледно во оваа ситуација не е важно дали си виновен туку во моментов има потреба да бидам осуден, а тоа е да бидам спречен да се кандидирам на повторените избори за градоначалник на општина Карпош“,
кажа Јакимовски.
Според него, поради ситуацијата со актуелниот градоначалник, Сотир Лукровски, власта барала решение како да се справи со пораз во општината на евентуални повторени избори за градоначалник, бидејќи, вели Јакимовски, рејтингот на власта во Карпош е преполовен.
„Повеќе од очигледно е дека лицето кое беше поставено за градоначалник на општина Карпош направи нешто коешто е незапаметено во политичката историја на Република Македонија, а тоа е да го напушти едноставно своето работно место и сега нормално е дека власта бара чаре, бара решение како да се справи со евентуалниот губиток овде на територијата на општина Карпош затоа што нивниот рејтинг овде во Карпош, односно бројот на гласовите се буквално преполовени и тоа е едноставно единствената причина зошто ја носат оваа пресуда, затоа што оди сите страни добивавме информации, а впрочем и вие ја добивте таа информација дека предметот се укинува и се враќа на повторно одлучување во Основниот суд. Ова сега е веќе нешто ново, очигледно е дека е направено под притисок“,
изјави поранешниот градоначалник на Карпош.
Посакувајќи им добро здравје, тој рече дека не им се лути на судиите, оти знае дека секој не може да го издржи тоа што тој го издржува. Јакимовски најави дека конечна одлука во врска со случајот ќе бараат од Врховниот суд, со надеж дека тој, како што кажа, ќе заземе правилен став и ќе ги отстрани недостатоците од, според него, политичката пресуда.
Јакимовски упати остри критики до власта, за која рече дека ги користи највиталните институции во справувањето со своите политички противници, додавајќи дека очекувал ваков потег бидејќи, како што наведе, тоа бил единствениот начин на која власта можела да се справи со него.
„Ова е само уште еден доказ дека ние во моментов имаме диктаторски режим кој со своите политички противници се пресметува преку највиталните институции, а тоа се Обвинителството и Судот, и искрен да бидам јас очекувам вакви и слични работи оти тоа е единствениот начин на кој тие можат да се справат со мене“,
кажа тој.
Јакимовски упати порака и до премиерот Христијан Мицкоски велејќи:
„Но она што сакам да му го порачам на премиерот, има тој малку познавање од историја, е илјадници години наназад важи една максима, една изрека: „Кој си игра со меч, од меч ќе загине“, односно: „Со каква мерка мериш, со таква мерка утре ќе ти мерат“. Но очигледно кога тие не се на власт, тие се познати плачковци, како плачат ако има политички прогон итн. Целиот овој прогон јас сум го издржал машки, не сум отсуствувал од ниедно рочиште, имало четириесетина рочишта, ниту еднаш не сум искористил дека сум болен или било каква друга здравствена причина, а сум имал здравствени причини зошто да не доаѓам, но секогаш сум го испочитувал судот надевајќи се во праведноста и носење на праведни одлуки на судовите во Македонија“,
рече Јакимовски.
На крајот, тој кажа дека во моментов, нему и на неговата одбрана не им преостанува ништо друго, туку да се надеваат на последната судска инстанца – Врховниот суд.
Од Судот денеска информираа дека, постапувајќи по жалбите на обвинетите и на надлежниот јавен обвинител, е донесена второстепена пресуда со која е потврдена првостепената одлука за кривичното дело бесправно градење, за кое на Јакимовски му е изречена казна затвор во траење од една година. Во изречената казна ќе му биде пресметано и времето поминато во куќен притвор во периодот од 19 март до 15 август 2019 година.
Со оглед дека во казната се пресметуваат околу пет месеци поминати во куќен притвор, на Јакимовски му остануваат за издржување уште околу седум месеци затворска казна во Казнено-поправната установа во Шуто Оризари.
Истовремено, Апелацискиот суд ја уважи жалбата на Јакимовски во делот што се однесува на обвинението за злоупотреба на службена положба и овластување, поради што предметот во тој сегмент се враќа на повторно судење.
Според судското соопштение, делото се однесува на периодот од 2011 до 2017 година, а согласно законските рокови, кривичното гонење за него би застарело во 2027 година.