Соединетите Американски Држави ги поддржуваат напорите на Западен Балкан за продлабочување и зајакнување на инклузивната регионална економска интеграција во согласност со правилата и стандардите на Европската Унија, изјави портпаролот на Стејт департментот Нед Прајс за Гласот на Америка.
„Ги охрабруваме регионалните лидери да бараат можности за намалување на трговските бариери, зголемување на економската конкурентност и изградба на регионално интегрирани и одржливи економии, кои го обезбедуваат она што им е потребно на граѓаните“,
рече Прајс во врска со позицијата на САД за иницијативата „Отворен Балкан“.
Претходно поддршка за „Отворен Балкан“ дадоа и од германската влада, од каде што рекоа дека секоја регионална соработка е од корист и дека соработката мора да биде инклузивна и отворена за сите шест земји во регионот.