За постапувањето на обвинителството по изборите, Шошкиќ, кој се спомнува меѓу кандидатите за премиер или министер во новата српска влада, вели дека професионалците треба да добијат простор да работат, а дека ќе има време да се испита и нивното претходно однесување
Дејан Шошкиќ, кандидат за пратеник од Студентската листа, поранешен гувернер на Народната банка на Србија и еден од оние што се спомнуваат како можен премиер на новата влада, очекува коруптивно-криминалниот систем навлезен во државата да се урне како кула од карти. Во интервју за Фонет, тој повика на законско постапување и смирување на тензиите.
„Време е за процедура, за почитување на законите, за смирување на тензиите“, рече Шошкиќ.
Наводите за уништување документација во институциите ги оцени како алармантни, но и како показател за паника. Ги повика вработените да одбијат незаконски наредби.
За постапувањето на обвинителството по изборите, Шошкиќ рече дека професионалците треба да добијат простор да работат, а дека ќе има време да се испита и нивното претходно однесување.
Во однос на Експо, побара проверка на безбедноста на изградените објекти, објавување на договорите и испитување евентуална кривична одговорност.
Шошкиќ предупреди и дека многу информации на социјалните мрежи биле преувеличени и повика да не се поттикнуваат неосновани стравувања.
Денеска во Србија беа уапсени началникот на Управата на криминалистичката полиција Марко Кричак и началникот на Службата за сузбивање криминал Бошко Секуловиќ, осомничени за злоупотреба на службената положба во случајот „Сењак“, а Кричак и за злоставување и мачење. Обвинителството тврди дека апсењата не се поврзани со изборните резултати и дека предистражните дејства почнале во мај.
Претходно, на 30 октомври, Народната банка на Србија ѝ ја одзеде дозволата за работа на Алта банка и го пренесе управувањето на Агенцијата за осигурување депозити. Обвинителството за организиран криминал побара итна проверка на работењето на банката и на евентуалните одливи на пари во странство, како и на постапувањето на одговорни лица во централната банка.