Епидемиологот Владимир Микиќ посочи дека на 100 000 жители, највисока е стапката на заболени во Дебар – 176, па во Куманово – 140, додека во другите градови стапката е под сто
Стапката на заболени од коронавирус на 100 илјади жители во земјава изнесува 40, 3 и тоа е се уште ниска стапка во споредба со Европа, изјави епидемиологот Владимир Микиќ во информативната видеосесија во владата насловена „Сè за коронавирусот“.
Тој рече дека досега се направени над 8.000 тестови за коронавирус, што е околу 4.000 тестови на еден милион жители. Со тоа, како што посочи, сме меѓу првите во регионот по број на направени тестови или, за споредба, трипати повеќе од Србија. Во овој момент, како што посочи, не треба масовно тестирање, затоа што, по препораки на Светската здравствена организација, главно, се тестираат само симптоматски случаи.
На 100 000 жители, највисока е стапката на заболени во Дебар – 176, па во Куманово – 140. Во другите градови стапката е под сто.
Има вкупно 34 смртни случаи асоцирани со коронавирус во земјава односно 4,1 процент стапка на смртност, наспроти стапката од 6.2 на светско ниво.
Микиќ рече дека повеќе од 65 отсто од починатите кај нас се над 60 години. Најмногу заболуваат лицата од 50 до 59 години, односно се уште бројот на заболени на повозрасни е далеку понизок во однос на другите возрасни групи. Инфицирани има на возраст од 0 до 91 година. На приближно 24 проценти од сите заболени им требало болничко лекување, а повеќе од половина од сите хоспитализирани имале и други заболувања, најчесто срцеви, респираторни и дијабетес.
Во светот досега, како што соопшти епидемилогот, заболени се 1,7 милиони од коронавирус, повеќе од половина милион се во САД, 160 илјади во Шпанија, 150 илјади во Италија и 90 илјади во Франција. Досега се регистрирани 108 илјади смртни случаи во светот, што е стапка на смртност од 6,2 проценти.
Најголем број смртни случаи, над 20 илјади или 3,9 проценти, има во САД, а во Европа – во Франција стапката на смртност 14,7 проценти.