Како што велат од ССМ, излезот од оваа ситуација ќе биде излегување на работниците и синдикатите на улица, блокирање преку штрајкови и протести, а доколку работодавците, како што велат, не си ја сфатат пораката и останат на ваквите неразумни ставови, ќе мораат да се обратат на друга адреса за работници оти „куферите на работниците се спакувани“
Сојузот на синдикати на Македонија (ССМ) свика вонредна седница откако Стопанската комора на Северна Македонија поднесе иницијатива до Уставниот суд со која се оспоруваат измените на Законот за работни односи со кој е предвидено недела да биде неработен ден за поголемиот дел од работниците.
„Недела ден на неделен одмор е реалност колку и тоа на газдите да не им се допаѓа, а не им се допаѓа поради тоа што ги полнеа џебовите на грбот на работниците кои им работеа без да ги плаќаат“,
велат од ССМ како реакција на иницијативата која ја поднесе Стопанската комора.
Од Сојузот на синдикати велат оти неделата како ден за одмор ден е загарантирана со Уставот, притоа се забранува присилна работа, а секој вработен има право на платен дневен, неделен и годишен одмор. Како што потенцираат, од тоа право работниците не смеат да се откажат, а работодавците не смеат да го ограничат.
„Милиони денари на работниците (кои работеле во недела без никакви ограничувања, а не биле плаќани за тоа) завршувале во џебовите на „газдите“ се причината за иницијативата поднесена од нивна страна до Уставниот суд. Прашуваме, како ако досега овие средства останувале во џебот на овие исти „газди“ кои поведуваат иницијатива поради тоа што работниците им работеа во недела без додаток на плата, тие се на работ на егзистенцијата, а не е работникот“,
истакнуваат од Сојузот на синдикати на Македонија.
Како што велат од ССМ, излезот од оваа ситуација ќе биде излегување на работниците и синдикатите на улица, блокирање преку штрајкови и протести, а доколку работодавците, како што велат, не си ја сфатат пораката и останат на ваквите неразумни ставови, ќе мораат да се обратат на друга адреса за работници оти „куферите на работниците се спакувани“.
„Ваквиот однос на работодавачите кои сметаат дека имаат робови, а не работници претставува карта во еден правец надвор од државата, па тогаш овие ‘големи газди’ сами со своите семејства ќе си работат во нивните бизниси поради тоа што без работници нема трговија, нема здравство, нема индустрија, без работници ништо нема да работи“,
наведуваат од ССМ.
Уставниот суд вчера објави дека Стопанската комора на Северна Македонија ги оспорила пред судот законските одредби за прогласување на недела за неработен ден, бидејќи сметаат дека е спротивен на слободата и пазарот на претприемништво.
Законските измени за недела неработен ден стапија во сила на 1 јануари годинава, откако претходно пратениците во Собранието ги изгласаа законските измени на 20 декември 2021.
На седницата на претседателството на ССМ е расправано и за средбата што задутре треба да се одржи во Владата за зголемување на минималната плата на 18 000 денари односно таа да не биде под 60 отсто од просечната плата со задолжително скалесто усогласување – зголемување на останатите плати согласно Законот за минимална плата и утврдување на право на регрес за годишен одмор за јавен сектор.