Одговарајќи на новинарско прашање за тоа како го коментира потегот на СОНК, кој согласно Законот за мирно решавање на работни спорови реши да го стави штрајкот во мирување, претседателот на ССМ, Дарко Димовски, посочи дека иако не е дел од Сојузот на синдикати, СОНК има безрезервна поддршка од нивна страна во однос на обезбедување правна помош со цел остварување на нивните работнички права
За да славиме, потребни ни се пари, а парите ни ги изеде инфлацијата, затоа на 1 Мај ќе простестираме, нема да славиме. Вака првиот човек на Сојузот на синдикати на Македонија (ССМ) Дарко Димовски го најави првомајскиот протест со кој ќе бараат покачување на платите за сите работници во износ од 2 806 денари, согласно покачувањето на минималната плата.
„Затоа сите работници, пензионери, младината да излезат заедно со нас за да им кажеме на сите работодавачи без разлика дали се од приватниот или од јавниот сектор дека што побрзо и ден побрзо ни се потребни пари за зголемување на нашите плати. Само ако излеземе масовно ќе ја покажеме неопходноста и така ќе го добиеме тоа што го бараме“,
рече претседателот на ССМ.
Димовски посочи оти во знак на солидарност е потребно линеарно покачување на платите од 2 806 денари за сите, од општи работници до претседателот на државата, додавајќи дека не бараат процентуално зголемување на платите оти таквото покачување, како што рече, ќе значи за едниот работник помалку, а за другиот работник повеќе
„Нас интенцијата како Сојуз на синдикати ни е да помогнеме на најниските слоеви на работници со најниски плати во знак на солидарност, во оваа како што реков, ковид-криза, економска, енергетска и но најново време воена криза која ни ја створи оваа инфлација и ни ги подјаде нашите приходи од плата“,
посочи Димовски.
Лидерот на ССМ додаде оти нема да се откажат ниту од барањето за регрес во јавниот сектор затоа што, како што посочи, тоа право го уживаат работниците во приватниот сектор.
„Сметаме дека на оваа дискриминација која е направена во 2008 година дојде денот кога треба да ѝ се стави крај и да го вратиме тоа право во општите колективни договори, како во јавниот, така и во приватниот сектор“,
додаде тој.
Во однос на анализите кои ги прави ССМ на месечно ниво во однос на цените на основните прехранбени продукти и износот на потрошувачката кошничка, Димовски посочи оти анализата од минатиот месец покажала зголемување на инфлацијата за 8,8 отсто на месечно ниво, додавајќи дека секој нареден месец инфлацијата е во постојан раст.
Оттука како што посочи доаѓаат нивните нивните барања за што поскоро покачување на платите за 2 806 денари оти, како што истакна, доколку не ги добиеме ден побрзо, наредниот месец нивната вредност може да биде помала во делот на растот на цените на основните прехранбени продукти.
Одговарајќи на новинарско прашање за тоа како го коментира потегот на Синдикатот за образование, наука и култура (СОНК), кој согласно Законот за мирно решавање на работни спорови реши да го стави штрајкот во мирување, Димовски посочи дека иако не е дел од Сојузот на синдикати, СОНК има безрезервна поддршка од нивна страна во однос на обезбедување правна помош со цел остварување на нивните работнички права.
„Ние ги повикуваме сите просветни работници во делот на консултации на правна помош и покрај тоа што не се членови во ССМ, да се обратат и да видиме по кој основ е прекинат штрајкот и дали има основа за прекин на штрајкот. Ја имаат нашата безрезервна поддршка како ССМ, да им дадеме правен совет и да им кажеме што понатаму за остварување на нивните работнички права“,
заклучи лидерот на Сојузот на синдикати на Македонија, Дарко Димовски.