Враќање на трошоците за храна и превоз и зголемување на минималната плата во првите 100 дена на новата влада, како што најави пред неколку дена претседателот на ССМ, ќе бидат главните барања што работниците ќе ги испорачаат на протестот на 1 мај
Сојузот на синдикатите на Македонија (ССМ) и Конфедерацијата на синдикалните организации на Македонија (КСОМ) денеска упатија заеднички повик до сите работници заедно со синдикатите да излезат на првомајскиот протест, кој ќе започне во 11 часот пред Работничкиот дом под мотото „Ние работниците“
Ова, како што информираат од ССМ, е договорено на заедничката средба на претседателот на ССМ, Слободан Трендафилов и претседателот на КСОМ, Марјан Ристески и секретарите на ССМ и КСОМ.
„Сојузот на синдикатите на Македонија и Конфедерацијата на синдикалните организации на Македонија ги слушнаа барањата на работниците за потребата од обединување на синдикатите и оваа година заедно го организираат работничкиот протест на Меѓународниот ден на трудот, 1 Мај. ССМ и КСОМ заедно излегуваат на работничкиот протест под мотото ‘Ние работниците’“,
соопштија од ССМ
Враќање на трошоците за храна и превоз и зголемување на минималната плата во првите 100 дена на новата влада, како што најави пред неколку дена претседателот на ССМ, ќе бидат главните барања што работниците ќе ги испорачаат на протестот на 1 мај.
Трендафилов изјави дека ова не треба да се смета само како повик од ССМ за учество на протестот, туку како повик од сите работници во земјава бидејќи сите заедно се соочуваат со притисокот од ниските плати, егзистенцијалните услови и со проблемите кои му се прават на синдикалното движење со конфискацијата на Работничкиот дом.