Синдикатите најавуваат оти ќе разговараат и за примената на новите законски одредби за недела неработен ден бидејќи одредени работодавци го кршат правилото
Утре (24 јануари) ќе се одржи средбата помеѓу Сојузот на синдикати на Македонија (ССМ) и Владата и на неа ќе се разговара за барањата на синдикатот за зголемување на минималната плата и за примена на законските измени со кои недела е прогласен за неработен ден.
Од Синдикатот бараат итно зголемување на минималната плата на 18 илјади денари и скалесто зголемување на сите други плати, а нивно барање е и утврдување на правото на регрес во јавниот сектор.
На средбата, како што информираат од Синдикатот, ќе се разговара и за примената на законот со кој недела е прогласен за неработен ден затоа што од страна на одредени работодавци се крши законот за што од страна на ССМ се доставени претставки до Трудовниот и Пазарниот инспекторат.
Од ССМ потенцираат дека јавно укажува оти отстапки не треба да има и доколку прашањата не бидат решени преку социјален дијалог веднаш, ќе ги повикаат работниците и членството на „генерален сеработнички штрајк“.