Пациентите кои се позитивни на коронавирус и кои се наоѓаат во карантин на белградскиот саем, најавуваат штрајк со глад доколку не им се даде можност за повторување на тестирањето, соопшти белградската ТВ Н1.
Телевизијата објави дека планот на пациентите е да започнат со штрајк утре (сабота), затоа што, меѓу другото, од недела немаат никаква информација за тестирањето на вирусот ковид-19, а резултатите и новите тестови ги чекаат десет дена.
„Одговорниот епидемиолог Божидар Љубиќ негира каква било одговорност и не сака да разговара со пациентите, поради што не наоѓаме друг начин да добиеме можност за повторување на тестот. Покрај тоа, никогаш официјално не ни беа кажани резултатите од претходно направените тестови, ниту пак ни беше дадено нешто написмено“,
се наведува во апелот испратен до медиумите.
Како што посочуваат, на саемот кој беше претворен во привремената болница има постари лица, хронични пациенти и едно дете, а условите, според пациентите, не се најдобри за нивно закрепнување.
„Иако станува збор за привремена болница, немаме здравствени картони, ниту соодветна терапија. Од друга страна, голем број на луѓе немаат никакви симптоми“,
се додава во апелот.
Тие потсетуваат дека било најавено дека на Саемот ќе доаѓаат новотестирани со лесни симптоми на епидемијата, но тоа, како што велат, не се случува, па таму се сместени само патници и лица кои претходно биле лекувани во болниците.
Кога станува збор за условите, тие велат дека се подобриле со добивањето на монтажни тушеви и топла вода.
Според податоците на српските власти, во привремената болница на белградскиот саем се наоѓаат околу педесет пациенти, од можните 3000 легла, а за иста намена во Србија веќе се подготвени и салите Пинки во Белград, Чаир во Ниш, новосадскиот саем и други објекти.