Одлуката на ХБО уследи по повикот на украинското Министерство за надворешни работи, кое на 24 јануари објави дека српскиот актер и руски државјанин „ја поддржува Русија од почетокот на инвазијата“
Продуцентите на серијата „Белиот лотос“ (The White Lotus), во чија трета сезона требаше да игра српскиот актер Милош Биковиќ, го откажаа неговиот ангажман.
Портпаролот на ХБО објави дека улогата што требаше да ја игра Биковиќ во серијата ќе му биде доделена на друг актер.
„Решивме да ја прекинеме соработката со Милош Биковиќ и улогата ќе му биде доделена на друг актер“,
изјавил портпаролот на ХБО.
Одлуката на ХБО уследи по повикот на украинското Министерство за надворешни работи, кое на 24 јануари објави дека српскиот актер и руски државјанин „ја поддржува Русија од почетокот на инвазијата“.
„Дали е во ред да се работи со лице кое поддржува геноцид и го прекршува меѓународното право“,
го праша украинското МНР тогаш ХБО.
На видеото што ја придружуваше објавата на украинската дипломатија на социјалната мрежа Икс, се гледаше како Биковиќ го добива Орденот на честа од рускиот претседател Владимир Путин во 2018 година, нарекувајќи го актерот „странски гласник на Кремљ“.
Биковиќ има руско државјанство од 2021 година. Покрај тоа што се нарекува себеси „активен член на руското општество“ и присуствувал на панел-дискусии организирани од владата, тој соработувал и со поддржувачи на инвазијата во руската забавна индустрија, како режисерот Никита Михалков. Според интервјуто што го дал за руското издание „Телеграф“ во 2019 година, му бил забранет влез во Украина, пишува „Variety“.
Биковиќ по ова се огласи на социјалната мрежа Икс, наведувајќи дека против него се води „таргетирана кампања која фрла сенка на суштината на уметничката слобода“.
„Пораснав во земја разурната од војна. Кога имав 11 години, поминував денови и ноќи во засолниште, додека мојата земја и мојот роден град беа бомбардирани. Никогаш никому не би посакал таков пустош. Секој ден има се повеќе конфликти низ целиот свет. Секој од нив е различен и секој еден од нив е страшен. Би сакал сите да престанат и да преовлада принципот на љубовта. Денеска против мене се води таргетирана кампања која преку надворешно влијание создава сериозен преседан, фрлајќи сенка врз суштината на уметничката слобода. Резултатот од таквиот наратив е триумфот на бесмислиците и поразот на уметноста“,
се вели во реакцијата на Биковиќ.