Како што најавуваат од ССМ, в петок ќе бидат свикани сите тела на Сојузот за да се активираат штрајкувачките одбори за, како што велат, да се запазат постапките за штрајк и да се утврди датум за подготовки за штрајк
Сојузот на синдикати на Македонија (ССМ) соопшти оти денешната средба со Владата на која требаше да се разговара за зголемување на минималната плата и за примена на законските измени за недела неработен ден е одложена за следната недела, односно за 31 јануари, поради што в петок ќе бидат свикани сите тела на Сојузот за да се активираат штрајкувачките одбори.
„На разочарување на работниците, средба помеѓу Владата и ССМ закажана за денеска се одлага за 31.01.2022 година по барање на Владата. ССМ после презентацијата на Студијата за минималната плата во Република Северна Македонија и нејзините ефекти врз работењето на фирмите изготвена од еминентни професори, во четврток продолжува со активностите и уште одма во петок ќе го свика претседателството на ССМ, Советот на ССМ и регионалните синдикални претставништва и канцеларии со една цел – да се активираат штрајкувачките одбори и да се запазат постапките за штрајк како и утврдување дата за подготовки за штрајк“,
информира ССМ.
Овие активности, според Сојузот, се со една цел – решавање на егзистенцијалните проблеми на работниците, зголемување на минималната плата на 18 000 денари, зголемување на останатите плати и утврдување на регресот за годишен одмор познат како К-15 во јавниот сектор согласно утврденото право на работниците во приватниот сектор.
Оттаму бараат и продолжување на мерката за „замрзнување“ на цените на основните прехранбени продукти и по 31 јануари, до кога всушност беше предвидено да важи оваа мерка.