На агендата на германското претседателство има конкретна цел – успехот кој го заслуживте со напорната работа на европскиот пат, да биде заокружен оваа година, му посочила амбасадорката Холштајн на новиот вицепремиер за европски прашања
Вицепремиерот за европски прашања Никола Димитров денеска имаше средба со амбасадорката на Германија, Анке Гизеле Холштајн, прва по преземањето на новата функција во Владата.
Во фокусот на разговорот, како што соопштија од Секретаријатот за европски прашања, беше заедничкиот стремеж за влез во следната фаза од евроинтеграцискиот процес – одржување на првата меѓувладина конференција за формално почнување на преговорите на Северна Македонија со Европската Унија и тоа за време на германското претседателство со Советот на ЕУ.
„Блиску сме до целта, која всушност ќе претставува почеток на најважното европско патување за нашата земја. Привилегија е што ја имаме Германија за пријател кој ќе ни помогне да ја преминеме линијата на заедничкиот успех – првата меѓувладина конференција со историски предзнак“,
истакна Димитров.
Амбасадорката Холштајн на Димитров му посака успех во новите предизвици што ги носи новата функција, потенцирајќи ги неговите заслуги за постигнувањата на Северна Македонија како на европскиот, така и на евроатлантскиот пат.
„На агендата на германското претседателство во однос на вашата земја има конкретна цел – успехот кој несомнено го заслуживте со напорната работа на европскиот пат, да биде заокружен оваа година. Токму по одржувањето на меѓувладината конференција следуваат предизвиците или како што вели германската изрека – тешкото започнува на рамно“,
му посочила амбасадорката Холштајн на Димитров.