Приоритетите на ОН за Северна Македонија согласно Рамката за развојна помош на ОН 2021 – 2025 година се одржливиот и инклузивен економски и социјален развој, климатските активности, природните ресурси и управувањето со ризик од катастрофи, транспарентното и одговорно демократско владеење, посочува постојаниот координатор и претставник на Програмата за развој на ОН во Северна Македонија
Заменик претседателот на Владата задолжен за европски прашања, Бојан Маричиќ на средба со постојаниот координатор и претставник на Програмата за развој на ОН во Северна Македонија, Армен Григориан разговарал за текот на пристапниот процес, како и за европските реформи кои Владата ги спроведува.
Во тој контекст двајцата соговорници потенцирале дека соработката со ОН е одличен пример за инклузивна донаторска поддршка која ги зема предвид сите релевантни чинители како националната и локалната власт, граѓанските организации, донаторите, приватниот сектор, медиумите и тоа во процесот на планирање, како и во процесот на спроведување на поддршката.
На средбата, Григориан посочил дека приоритетите на ОН за Северна Македонија согласно Рамката за развојна помош на ОН 2021 – 2025 година се одржливиот и инклузивен економски и социјален развој, климатските активности, природните ресурси и управувањето со ризик од катастрофи, транспарентното и одговорно демократско владеење, кои се целосно во согласност со националните приоритети за развој и полноправно членство во ЕУ.
Со вицепремиерот Маричиќ размениле мислења и околу потребите од поддршка од страна на УНДП за реализација на реформски проекти и други можности за интензивирање на соработката.
„Обединетите нации и агенциите на ОН се наш децениски партнер во постигнувањето инклузивен и одржлив развој и постигнувањето реформски цели кои произлегуваат од националните приоритети, за што би сакал да изразам искрена благодарност“,
рекол вицепремиерот Маричиќ.
УНДП има спроведено над 200 проекти од осамостојувањето на земјата досега, кои вредат над 66 милиони евра, и тоа финансирани или кофинансирани заедно со други донатори, со што имаат дадено значаен придонес во развојот на Северна Македонија, стои во соопштението од СЕП.