Поради оваа кандидатура на косовските власти, претседателот на Србија свика итна седница на Советот за национална безбедност, со образложение дека Приштина го прекршила Вашингтонскиот договор, кој Белград и Приштина го потпишаа во 2020 година, под покровителство на тогашниот американски претседател Доналд Трамп
Експертите велат дека приемот на Косово во Советот на Европа е долготрајна процедура, која можеби е олеснета со тоа што Русија не е таму, но дека сепак не зависи од Србија
Србија најавува дека е подготвена да ја рестартира кампањата за повлекување на признавањето на Косово. Ова го соопшти министерот за надворешни работи Никола Селаковиќ, по седницата на Советот за национална безбедност. Ваквата одлука доаѓа како одговор на барањето на Косово за членство во Советот на Европа.
Во белградските медиуми веќе извесно време се шпекулира дали Србија има нови земји кандидати за повлекување на признавањето на Косово. Се шпекулираше за цврстите ветувања на 14 земји. По завршувањето на Советот за национална безбедност, министерот за надворешни работи соопшти дека има четири такви земји, чии имиња ќе ги соопшти претседателот Вучиќ.
„Како министер за надворешни работи на претседателот Вучиќ му ги предадов дипломатските ноти на четири земји кои го повлекоа признавањето на таканареченото Косово, а Советот за национална безбедност го овласти претседателот Вучиќ да ја информира пошироката јавност кои земји се засегнати кога е потребно“,
рече Селаковиќ.
Причина за одлуката на Србија да го врати повлекувањето на признавањето во дипломатската игра е тоа што косовските власти поднесоа барање за членство во Советот на Европа.
Според Селаковиќ, две големи земји и даваат логистичка поддршка на Приштина за кампањата за добивање нови признанија, но и запирање на кампањата за повлекување на признавањата. И овојпат не спомена за кои земји станува збор.
„Со овој гест сакаме да им дадеме шанса на земјите-членки на Советот на Европа да не ја започнат процедурата за прием на таканареченото Косово во Советот на Европа во јуни“,
рече Селаковиќ.
Во меѓувреме, Н1 повикувајќи се на косовски медиуми објави дека министерката за надворешни работи и дијаспора во Владата на Косово, Доника Гервала денеска изјави дека немаат информации оти четири држави го повлекле признавањето на Косово.
Според неа, или тоа е невистинита вест, или Србија напорно работела на повлекување на признавањето.
Гевала рече дека Косово работи со пет земји-членки на ЕУ на нови признавања, што досега не го сториле.
Договорот од Вашингтон
Поради оваа кандидатура на косовските власти, претседателот на Србија свика итна седница на Советот за национална безбедност, со образложение дека Приштина го прекршила Вашингтонскиот договор, кој Белград и Приштина го потпишаа во 2020 година, под покровителство на тогашниот американски претседател Доналд Трамп.
Во точката 15 од тој договор се предвидува Косово да применува едногодишен мораториум за аплицирање за членство во меѓународни организации. Од друга страна, Србија се согласи на едногодишен мораториум на нејзината кампања за повлекување на признавањето на независноста на Косово.
Долга и макотрпна процедура која не зависи од Србија
Наташа Вучковиќ, извршна директорка на Центарот за демократија и поранешна потпретседателка на Парламентарното собрание на Советот на Европа, за Нова.рс објаснува дека ништо околу евентуалниот прием на Косово во оваа организација не зависи од нивните желби, туку првиот чекор е покана од Советот на Европа.
„Комитетот на министри, како тело на Советот на Европа во кое претставници се претставници на владите на земјите-членки, и тој поканува една земја да стане членка. Потребно е претходно две третини од членовите да бидат присутни и да гласаат за предлогот за членство на една земја во Советот на Европа. Потоа се активира Парламентарното собрание на Советот на Европа, кое треба да ги дефинира условите за членство и да утврди до кој степен Косово ги исполнува критериумите за прием“,
вели Вучковиќ.
За понатамошната процедура, Вучковиќ вели дека најголем предизвик е дали предлогот ќе има двотретинско мнозинство во Парламентарното собрание на Советот на Европа.
„Многу е важно да се нагласи дека често се случува членовите на Парламентарното собрание да не гласаат како што гласаат нивните влади, а со оглед на тоа што Русија повеќе не е членка на Советот на Европа, за очекување е Косово на крајот да добие поддршка од две третини. Во секој случај, тоа е процес кој ќе потрае“,
вели таа.
Политикологот Цвијетин Миливојевиќ смета,пак, дека последниот збор за тоа дали Косово ќе стане членка на Советот на Европа ќе го каже Америка.
„Во овој момент се работи само за добрата волја на центарот на моќ од Вашингтон, а можеби и од Берлин, дали ќе нареди прием на Косово или ќе го запре. Сите знаеме дека Косово беше примено во Меѓународниот олимписки комитет, така што Србија се правеше мртва и не присуствуваше на седницата на која беше одлучено, а со тоа свесно ја пропушти можноста барем да се побуни. Да не зборуваме за приемот на Косово во ФИФА, ФИБА… Успеавме само да го спречиме нивниот прием во УНЕСКО, не благодарение на нашата дипломатија, туку исклучиво на лобирањето во Русија и Кина“,
вели Миливојевиќ.