Во Законот за референдум ќе се прават измени и дополнувања на три членови
Српската Влада на денешната седница донесе одлука за повлекување на законот за експропријација од собраниска процедура, кој до Собранието на повторно одлучување го врати претседателот Александар Вучиќ.
Како што информираат српските медиуми, Владата ќе направи анализа за тоа дали се потребни измени и допуни во овој закон и доколку се констатира дека промените се неопходни, тоа ќе се направи преку широка јавна деба, во која ќе биде вклучена експертската јавност, стручни здруженија како и економисти.
На истата седница, српската Влада предложила измени и дополнувања во Законот за референдум и народна иницијатива, во членовите 7, 20, 43 и 44.
Споменатите членови се однесуваат на потврда за потпис на претставници од овластен предлагач во органите за спроведување референдум и на рок за повторно распишување на референдум.
Во предлогот на Владата се укинува таксата за потврда на потпис, што им овозможува на претставниците на овластените предлагачи да бидат дел од органите за спроведување на референдумот.
Исто така, според предлогот нема да може да се распише референдум во рок пократок од четири години, а Собранието во рок од четири години нема да може да донесе поинаква одлука од онаа која е потврдена на референдумот.
Токму спорниот закон за експропријација и измените во законот за референдум беа причина поради која во текот на изминатата недела во Србија имаше масовни протести и блокади на патиштата.