Предвидено е таа да се сретне со премиерот Христијан Мицкоски со кој ќе имаат тет-а-тет средба, а потоа ќе се одржи билатерална средба со владини претставници. Предвидено е и Кос и Мицкоски да одржат заедничка прес-конференција во Владата
Патот на Македонија кон Европската Унија, напорите за реформи со фокус на спроведувањето на агендата за реформи во рамките на планот за раст на Западен Балкан. Ова се причините поради кои еврокомесарката за проширување Марта Кос денеска ќе пристигне на средби во Скопје.
Предвидено е таа да се сретне со премиерот Христијан Мицкоски со кој ќе имаат тет-а-тет средба, а потоа ќе се одржи билатерална средба со владини претставници. Предвидено е и Кос и Мицкоски да одржат заедничка прес-конференција во Владата.
Кос ќе има средба и со вицепремиерот и министер за европски прашања, Беким Сали и со претседателот на Собранието, Африм Гаши.
Во пресрет на посетата, Кос изјави дека Северна Македонија покажала дека може да испорача резултати кога има политичка волја.
„Ова јасно го гледаме во нејзините силни перформанси во рамките на реформската агенда. Ќе дојдам во Скопјe за да ја охрабрам Владата да го стори истото тоа и во преговорите за пристапување. Сега имаме можност која се случува еднаш во генерацијата, да го оствариме проширувањето. Ова доаѓа со јасни избори. Оние што ги исполнуваат своите обврски напредуваат. Ова го гледаме најјасно во Црна Гора и Албанија. Оние што не ги исполнуваат своите обврски, заостануваат. Во моменти на забрзување застојот значи фактичко назадување“,
вели Кос.
Според неа, напредокот во преговорите за пристапување бара клучен елемент – доверба меѓу земјите кандидати и земјите членки.
„Според моето искуство, таквата доверба првенствено се гради врз два елемента – исполнување на обврските и ставот на земјите кандидати кон ЕУ и нејзините земји членки. Ова почнува со добрососедски односи. Кога меѓусебната доверба расте, процесот на пристапување станува побезбеден. Убедена сум дека ова би било случај и за Северна Македонија“,
смета таа.
Кос вели дека досега нема случај на давање гаранции на земја кандидат дека нема да се појави друг спор за време на пристапниот процес до ратификацијата на договорот за пристапување од последната од 27-те земји членки.
„Вистината е дека ниедна земја кандидат никогаш не добила гаранција дека нема да се појави друг спор за време на процесот на пристапување сè до моментот кога и последната земја членка ќе го ратификува договорот за пристапување. Ова е начинот на кој функционира проширувањето на ЕУ. Важно е да се прифати оваа реалност“,
нагласува Кос.
Коментирајќи го германско-францускиот нон пејпер, кој промовира постепена интеграција на Западен Балкан во ЕУ пред полноправно членство, таа вели дека процесот на пристапување бара време, но оти во денешниот свет Европската Унија не може да си дозволи да чека предолго. И, вели, задоволна е од тоа што гледа како европските лидери ја водат оваа дебата, со цел да се изнајдат начини да се доближи ЕУ до идните граѓани многу порано.
„По летото, Комисијата има намера да предложи нови начини на земјите членки да ги доближат земјите кандидатки до ЕУ пред пристапувањето. Но, има една важна точка. Ова ќе бара напредок во преговорите за пристапување. Ова останува приоритет. Без таков напредок, понатамошната постепена интеграција ќе биде ограничена“,
вели таа.