Според најавите на првиот човек на МОН, кој во ноември лани го претстави акцискиот план, реализацијата на проектот треба да започне на почетокот на оваа година со домот „Стив Наумов“ во Скопје каде што условите за престој се најлоши
Според најавите што ги даде министерот за образование и наука Јетон Шаќири во ноември минатата година, во текот на месецов или наредниот треба да почне првата и подготвителна фаза од проектот кој предвидува реновирање на државните студентски домови во земјава.
Реконструкцијата на студентските домови ќе се врши етапно, во три фази, а ќе опфати осум објекти.
Според најавите на првиот човек на МОН, кој во ноември го претстави Акцискиот план, реализацијата на проектот треба да започне на почетокот на оваа година со домот „Стив Наумов“ во Скопје каде што условите за престој се најлоши.
„МОН веќе има добиен проект кој треба да почне што побргу. Очекувам првата фаза да биде во јануари-февруари кога е предвидено реновирање на неколку студентски домови. Акцискиот план предвидува за три години да бидат реновирани сите студентски домови во нашата земја. Проектот е вреден 20 милиони евра и ги опфаќа студентските домови: ‘Стив Наумов’, ‘Кузман Јосифовски-Питу’, ‘Гоце Делчев’, ‘Томе Стефановски-Сениќ’ и ‘Пелагонија’ во Скопје, ‘Орде Чопела’ во Прилеп, ‘Кочо Рацин’ во Битола, ‘Браќа Миладиновци’ во Штип и ‘Никола Карев’ во Охрид“,
изјави министерот Шаќири во ноември лани.
Во рамки на првата фаза, која се очекува да започне на почетокот на оваа година, треба да започнат градежните работи, а според акцискиот план, втората и третата фаза од проектот за реновирање на студентските домови ќе бидат распределени во следните две години.