Во бездната во која нè води антидемократската и антиевропска СДСМ одлучи да се приклучи и ВМРО-ДПМНЕ, изјави портпаролот на Левица, Амар Мециновиќ, коментирајќи го ставот со кој излезе опозицискиот лидер Христијан Мицкоски по лидерската средба со Ковачевски, односно дека неговата партија е подготвена да влезе во влада со СДСМ, но во неа да не биде ДУИ
Несомнено е дека ги живееме најтемните дни за македонската демократија. Со овие зборови опозициската партија Левица го прокоментира исходот од денешната лидерска средба меѓу премиерот Димитар Ковачевски и лидерот на опозицијата Христијан Мицкоски, од која опозиционерот излезе со подготвеност неговата партија да влезе во влада со СДСМ, но во неа да не биде ДУИ.
„Пратеници потпишуваа изјави на нотар, потоа се нудеа предвремени избори, ставање на уставните измени во предизборните програми и на крајот Извршиот комитет на ВМРО-ДПМНЕ сабајлево излезе со изјава дека не ги прифаќаат уставните измени под бугарски диктат. Но, тоа е само изјава за членството, кое сепак е свесно за одлуките на раководството. Јасно е дека ВМРО-ДПМНЕ има улога во исполнувањето на софиската платформа“,
изјави портпаролот на Левица, Амар Мециновиќ.
Тој оцени оти државава се движи кон криза на демократијата, велејќи дека „во бездната во која нè води антидемократската и антиевропска СДСМ одлучи да се приклучи и ВМРО-ДПМНЕ“.
„Владата нема легитимитет. Првпат го загуби во 2021 година на локалните избори, потоа добивме неизбран премиер, кој со својата нелегитимна влада беше целосно нетранспарентен во изготвување на францускиот предлог со Софија во посредништво на Париз, а сега имаме ситуација каде што постои консензус за францускиот предлог, но се работи на поларизација на нашето општество“,
рече Мециновиќ.
Меѓу останатото, портпаролот на Левица оцени дека опозицискиот лидер Христијан Мицкоски имал многу променливи изјави во врска со уставните измени, а условот што го постави за влез во Владата, ако од неа излезе ДУИ, оцени дека не е искрен во целост.