„Без рзлика дали законот ќе оди во Венецијанска комисија или не, сите закони ќе бидат разгледани во текот на билатералниот-скрининг кој ќе го имеме со ЕУ и нормално дека потоа ќе претрпат усогласување“, вели премиерот Ковачевски додавајќи оти Законот за здруженија, според него, нема преголеми недоречености во себе
Без разлика дали Законот за здруженија ќе биде испратен на анализа до Венецијанската комисија или не, тој секако е донесен со консензус од нашето Собрание, вели премиерот Димитар Ковачевски коментирајќи ја изјавата на шефот на дипломатијата Бујар Османи оти ќе ѝ предложи на Владата тој закон да биде испратен до Венецијанската комисија за да се утврди дали содржи спорни елементи или не.
„Без рзлика дали законот ќе оди во Венецијанска комисија или не, сите закони ќе бидат разгледани во текот на билатералниот-скрининг кој ќе го имеме со ЕУ и нормално дека потоа ќе претрпат усогласување“,
рече премиерот.
Според Ковачевски, Законот за здруженија нема преголеми недоречености во себе.
„Сметам дека тој Закон нема некои преголеми недоречености во себе бидејќи алудира само на чувствата на граѓантие во нашата држава кои се однесуваат на користење на имиња од периодот на Втората светска војна дека треба да бидат зачувани при организирањето на какви било клубови, организации или трговски друштва“,
рече премиерот.
Премиерот додаде дека ни е потребен закон за здруженија на граѓани којшто треба да ги вклучи сите политички парии и експерти, а како пример за изготвување на тој закон, вели Ковачевски, за пример треба да биде земено германското законодавство, оти како што кажа, Германија на многу висок степен ги има решено здружувањата на граѓаните и човековите права.
Вчера министерот за надворешни работи Бујар Османи на заедничката прес-конференција со бугарскиот колега Николај Милков изјави дека ќе ѝ предложи на Владата законот за здруженија да биде испратен до Венецијанската комисија за да се утврди дали има спорни елементи во себе, оти како што рече, биле оспорени некои прашања од самите законски измени.
Ппратениците и од власта и од опозицијата неодамна без ниту еден глас против, ниту воздржани со 67 гласови „за“ ги изгласаа измените на Законот за здруженија и фондации, поднесен од ВМРО-ДПМНЕ и Законот за политички партии, поднесен од СДСМ, со кои се забранува здруженија и партии да носат фашистички имиња.
Предложените законски измени на двете партии уследија по отворањето бугарски клубови во земјава со имињата „Ванчо Михајлов“ на 16 април во Битола и „Цар Борис Трети“ на 7 октомври во Охрид.
Со усвоените измени, сите досега формирани здруженија и фондации, како и политички партии, имаат рок од три месеци да се усогласат со новите законски измени.