Од партијата додаваат дека покрај признавање на бугарското малцинство и замена на дефиницијата „јазик што го зборуваат повеќе од 20 отсто од населението“ со „албански јазик“, оттаму се посветени во овој процес да се направи чекор во борба против корупцијата
Наместо на предвремени парламентарни избори, во годината што претстои сите политички и државни капацитети во земјава треба да бидат концентрирани во реализација на преземената обврска за уставни измени преку „францускиот предлог”. Ова денеска го порача коалицискиот партнер во Владата, Алтернатива, кој смета дека 2023 е година на уставни измени, а не на предвремени избори.
„Алтернатива стана дел од власта со писмен договор, чија прва точка е деблокирање на евроинтеграцискиот процес и започнување на преговорите со Европска Унија. Започнувањето на суштинските преговори со ЕУ значи поинтензивна динамика на реформи и подобрување на квалитетот на услугите за граѓаните“,
се вели во соопштението на Алтернатива.
Од партијата додаваат дека покрај признавање на бугарското малцинство и замена на дефиницијата „јазик што го зборуваат повеќе од 20 отсто од населението“ со „албански јазик“, оттаму се посветени во овој процес да се направи чекор во борба против корупцијата.
„Затоа, предложивме уставен амандман за санкционирање на корупцијата на високо ниво, за што бараме поддршка од внатрешни и меѓународни фактори“,
додаваат оттаму.
Покрај уставните измени, според Алтернатива, годинава Владата ќе има полни раце работа.
„Се обидуваме да постигнеме договор за изградба на нов Клинички центар, со уникатен модел на финансирање предложен од нашиот министер за здравство. Посветени сме за реформирање на јавната администрација и дигитализација на јавните услуги, олеснувајќи ги административните обврски за граѓаните“,
додаваат од Алтернатива во партиското соопштение.