Под урнатините во Бејрут сè уште се прават обиди да се најде евентуално некој преживеан во страшната експлозија што се случи пред еден месец на пристаништето во центарот на градот.
Како што пренесува Си-ен-ен, чилеански тим на спасувачи со детектор трагаат по евентуални преживеани лица, иако од експлозијата досега поминаа 30 дена. Наводно, детекторот регистрирал звуци под урнатините кои може да бидат на човек кој ја преживеал експлозијата.
Спасувачките екипи во Бејрут вчера детектираа движење под урнатините во областа Мар Михаел, а тимот побара од жителите да бидат тивки на местото на настанот за да го утврдат изворот на движењето.
Ова се случи откако куче за спасување од чилеански спасувачки тим даде знак дека некое лице сè уште може да биде живо под урнатините.
Термичките слики покажуваат две тела; мало тело збиено до поголемо тело и циклус на дишење од 18 вдишувања во минута е снимен на уредот, изјави за Си-ен-ен, Еди Битар, локален невладин работник кој работи со чилеанскиот тим.
„Тоа се 18 вдишувања во минута. Мали се шансите човекот да е сè уште жив. Куче трагач од чилеанскиот тим реагирало на местото на настанот додека тие поминале покрај зградата, поттикнувајќи го претресот“,
рече тој.
Франциско Лерманда од чилеанската невладина организација за потрага и спасување „Топос Чиле“ во Бејрут изјави дека спасувачкиот тим копа тунели за да пристапи до местото каде што би можело да има тело или преживеан.
Тој рече дека откако ископале еден метар, кучето Флеч, кое ги предупредило спасувачките екипи за остатоците, повторно реагирало. Лерманда рече дека иако тоа не мора да значи дека некое лице е живо под урнатините, тие ќе се однесуваат со таква претпоставка сѐ додека тоа евентуално се покаже како неточно.
Лерманда додаде дека најдолго што видел некој да преживее под урнатини е човек на Хаити, кој бил пронајден по 28 дена.