За нас е важно да го донесеме најдоброто решение за граѓаните и да се остави можност, ако сака граѓанинот да ја смени табличката тоа да може да го направи, а ако сака да стави налепница и тоа да е можно. Тоа би било едно од можните решенија, вели министерот Спасовски
Како Министерство за внатрешни работи сметаме дека едно од можните решенија за промената на регистарските таблички е да се стават налепници. Со налепници, практично, без некаков трошок или многу мал трошок, ќе се задоволи тој законски момент, рече министерот Оливер Спасовски во денешната утринска програма на националната телевизија.
Според него, барањето решение е во напредна фаза, но на крајот, сепак, како што вели, ќе се разговара и на седница на Владата во однос на конечното решение.
Министерот Спасовски истакна дека има три категории возила со регистарски таблички.
„Имаме регистарски таблички со три бројки кои се многу стари, кои не се променети воопшто. Имаме околу 230 000 таблички кои практично се со МК и нови таблички со четири бројки кои треба да се променат и уште толку кои веќе се променети, односно преку 230 000 кои се променети”,
истакна министерот Спасовски.
Сепак, според министерот Спасовски, најважно за МВР е да се донесе најдоброто решение.
„За нас е важно да го донесеме најдоброто решение за граѓаните и да се остави можност, ако сака граѓанинот да ја смени табличката тоа да може да го направи, а ако сака да стави налепница и тоа да е можно. Тоа би било едно од можните решенија. Јас очекувам дека наскоро ќе го дефинираме и ќе излеземе пред јавноста. Секое решение што е во интерес на граѓаните ќе го направиме. Ние стоиме на располагање преку измени во упатства да имаме поповолно решенија за секој од нас”,
рече министерот Спасовски.
Во однос на цените за вадење патни исправи, кои треба да бидат зголемени и за кои јавноста веќе реагира, Спасовски вели дека решението сè уште не е во важност, меѓутоа до тоа треба да дојде затоа што 15 години наназад немало никаква промена на цените.
„Но, набавните цени на обрасците се зголемени за скоро 90 отсто и ако има зголемување на набаваната цена ние ќе мора да го наплатиме тоа затоа што нема да дојде до производство“,
рече Спасовски.
Сепак, додаде тој, интересот на граѓаните е во прв план. Сметаме дека треба да направиме најдобро можно решение во кое ќе ги покриеме трошоците за производство и притоа да не се доведеме во состојба да не може да имаме производство и набавка на материјали.
„Првпат во ова решение ќе воведеме цената да остане иста, односно 1 500 денари за лица до 27 години што вадат пасош на 5 години, додека за сите други ќе се зголеми за 500 денари. Тоа е цена која ќе ја има една патна исправа имајќи предвид дека ќе имате патна исправа која ќе важи 10 години и тоа е по 50 денари зголемување на годишно ниво. Тоа не е желба ниту моја ниту на кој било, тоа се условите на пазарот кои мора да ги почитуваме“,
додаде министерот.
До февруари 2024 година граѓаните имаат законска обврска да ги сменат сите лични документи на кои наместо досегашното име Република Македонија треба да стои новото име, кое произлегува од Преспанскиот договор со Грција и Република Северна Македонија.