Мерките за помош нема да може да ги користат оние кои отпуштиле работници од почнувањето кризата со коронавирусот, рече премиерот Оливер Спасовски во вчерашното гостување на Канал 5.
„Во првиот сет на мерки во којшто има можност тие да бидат ликвидни со тоа што би земале кредит од Меѓународната банка за поддршка на развојот со нула проценти камата е за да можат компаниите овој период да го пребродат. Имаме следна мерка која ќе се утврди, а тоа е помош на компаниите со обезбедување на минимална плата на работниците. И тоа е таа предвидливост која што ќе им ја дадеме во наредните два месеци во април и во мај да се помогне на стопанството. Ќе се утврдат точни критериуми кои се тие фирми компании коишто ќе можат да ја искористат оваа поволност“,
појасни Спасовски.
Премиерот најави помош и за медиумските работници кои, според него, се наоѓаат на прва борбена линија и помагаат во справувањето со оваа криза.
„На нас ни е многу важно медиумите да функционираат во овој момент. Да функционираме сите заедно да помогнеме во делот на кризата. Секако дека ќе имаме мерки и во делот на медиумите. Јас знам дека веќе има одредена финансиска помош од АВМУ. Се што е помош од државата е помош од државата. Така да тоа е еден дел од помошта , нема медиумите да бидат изоставени од оваа помош заради тоа што сметам дека и тука треба да се помогне да може тие да функционираат“,
рече Спасовски.