Првиот човек на МВР не кажа дали на бугарскиот европратеник ќе му биде дозволен влез во Северна Македонија доколку тој одлучи да дојде на одбележувањето на раѓањето на Гоце Делчев во земјава
Премиерот Димитар Ковачевски, пак, денеска од Штип нагласи дека на МВР е да ги преземе сите мерки за безбедно чествување на 4 февруари, но и дека Министерството може да постапи согласно Законот за странци, односно одредбите кои регулираат кое лице не може да влезе во државата заради активности кои ги нарушуваат меѓународните односи на нашата држава и внатрешниот поредок
Сè уште не се знае дали ако на 4 февруари бугарскиот европратеник Ангел Џамбаски одлучи да дојде во Северна Македонија по повод одбележувањето на раѓањето на Гоце Делчев, би му било дозволено да влезе во земјава или дали евентуално би бил вратен назад.
Владата на вчерашната седница му наложи на Министерството за внатрешни работи (МВР) да ги преземе сите мерки за обезбедување на настанот на 4 февруари, согласно препораките од Советот за безбедност, но не кажа дали ќе им забрани влез во државава на еден пратеник од Бугарија во Европскиот парламент и на неколку други лица – државјани на Бугарија поради дејствија што претходно ги преземале и сè уште ги преземаат против нашата држава.
На прашањето дали МВР ќе му дозволи на овој европратеник да ја помине границата со Северна Македонија на 4 февруари, конкретно не одговори ниту министерот за внатрешни работи Оливер Спасовски, туку кажа:
„Ќе одлучиме на 4 февруари“,
изјави министерот за внатрешни работи Оливер Спасовски во одговор на прашањето дали на Џамбаски ќе му биде дозволено да влезе во Северна Македонија на 4 февруари.
Во насока на чествувањето на денот на раѓањето на Гоце Делчев во земјава, Спасовски кажа дека согласно владината одлука, МВР ќе ги преземе сите мерки за зачувување на безбедноста и стабилноста, а тоа, како што додаде, ќе значи заштита на нашиот национален интерес и идентитет, на нашето право на самоопределување и на достоинството на македонскиот народ.
Тој истакна дека Министерството работи заедно со Агенцијата за национална безбедност во размена на податоци и на основа на тие податоци и информации МВР ќе носи одлуки во секој поглед.
Активностите за обезбедување на мирот и стабилноста се во исклучива надлежност на МВР, изјави денеска премиерот Димитар Ковачевски од Штип и нагласи дека Министерството може да постапи согласно Законот за странци односно одредбите кои регулираат кое лице не може да влезе во државата заради активности кои ги нарушуваат меѓународните односи на нашата држава и внатрешниот поредок.
„Значи три детални основи се и доколку тоа лице, без разлика дали е политичар или се знаимава со некаква друга дејност, сака да влезе во државата и доколку по тие основи се идентификува од страна на Министерството за внатрешни работи, тогаш се спроведува процедурата и не може да влезе во државата. Така што тоа е спроведување на законско решение“,
изјави премиерот Димитар Ковачевски одговарајќи на новинарско прашање по посетата на Универзитетот „Гоце Делчев“ во Штип.
Владата на вчерашната седница донесе заклучоци во врска со одбележувањето на денот на раѓањето на Гоце Делчев, 4 февруари, со кои го задолжи Министерството за внатрешни работи да ги преземе сите мерки за обезбедување на настанот, согласно препораките од Советот за безбедност што се одржа во понеделникот.
Претседателот на државата Стево Пендаровски по седницата на Советот за безбедност во понеделникот соопшти дека, според сите проценки и анализи на надлежните безбедносни служби, одбележувањето на раѓањето на Гоце Делчев на 4 февруари ќе биде настан од висок безбедносен ризик.
На овој ден, како што истакна претседателот, организирани структури во Бугарија се мобилизирани да поддржат организирано доаѓање во Скопје на повеќе лица, кои спроведуваат антидржавни кампањи кон С Македонија.
Говорејќи во овој контекст, Пендаровски изјави дека ќе ѝ предложи на Владата да им забрани влез во државава на еден пратеник од Бугарија во Европскиот парламент и на неколку други лица – државјани на Бугарија поради дејствија што претходно ги преземале и сè уште ги преземаат против нашата држава.
Сепак, од заклучоците од вчерашната седница на Владата во врска со одбележувањето на 4 февруари, никаде во соопштението не се споменува конкретно забрана за влез на европратеник и други бугарски државјани што ги наведе претседателот на државата.