Националната авиокомпанија на Мароко „Ројал ер Марок“ планираше седум дополнителни лета откако Фудбалската федерација на земјата донесе одлука со која им вети на навивачите дека ќе им даде 13 000 бесплатни билети за натпреварот со Франција, но катарските власти денеска во последен момент ги суспендираа дополнителните летови за Доха
Стотици марокански фудбалски навивачи се во очај по откажувањето во последен миг на авионските летови што ги спречи да заминат за Катар и да ја бодрат својата фудбалска репрезентација на вечерашниот полуфинален натпревар на Светското првенство со тимот на Франција, јавува Би-би-си.
Националната авиокомпанија на Мароко „Ројал ер Марок“ планираше седум дополнителни лета откако Фудбалската федерација на Мароко донесе одлука со која им вети на навивачите дека ќе им даде 13 000 бесплатни билети за натпреварот со Франција.
Но, денеска од мароканската авиокомпанија соопштиле дека катарските власти ги блокирале летовите.
„По најновите ограничувања наметнати од катарските власти, `Ројал ер Марок` со жалење ги информира клиентите за откажувањето на летовите со кои оперира`Катар ервејс`“,
се вели во соопштението на авиокомпанијата за новинската агенција Ројтерс.
Засега е нејасно зошто катарските власти ѝ наредија на авиокомпанијата да ги суспендира летовите.
Во објава на своите канали на социјалните мрежи во понеделникот, мароканската авиокомпанија понуди 30 дополнителни лета како дел од „вонредниот распоред на летови“ за да им помогне на навивачите да стигнат до Катар. Сепак, туристички агенции подоцна соопштија дека ќе има само седум дополнителни лета.
Откажувањето остави со празни џебови голем број навивачи кои веќе резервираа билети и хотелски соби.
Авиокомпанијата понуди целосно извинување и рече дека ќе им ги надомести средствата на патниците.
Во меѓувреме голем број марокански иселеници пристигнаа во земјата, привлечени од ветувањето за бесплатни билети од фудбалската асоцијација на Мароко.
Се проценува дека околу пет милиони Мароканци живеат ширум светот, а многу од нив се во Франција.
Но, додека навивачите пристигаа во центрите за навивачи на стадионот „Ал Џануб, многумина покривајќи ги главите со своите марокански знамиња и капи за да се заштитат од топлината, тие останаа лути кога бесплатните билети ветени од Фудбалската асоцијација не се реализираа.
Една од поддржувачките, Зинеб Нфати, за Би-би-си изјавила дека допатувала од Париз за натпреварот, но не можела да најде билет.
„Ова е многу симболична игра – тоа е Мароко против Франција, а јас сум половина Французинка, половина Мароканка. Проблемот е што нема веродостојни извори. Нема веродостојни информации. Дојдов овде со брат ми и не знам што ќе правиме… Срцето ми е скршено“,
вели Нфати.
Фудбалерите на Мароко приредија вистинска сензација на Светското првенство во Катар откако во четвртфиналето ја совладаа селекцијата на Португалија и обезбедија пласман во полуфиналето.
Со ваквиот подвиг Мароканците станаа првата африканска репрезентација во историјата која ќе игра полуфинале на едно светско првенство.
Тренерот на Мароко, Валид Реграги, кој пораснал во Париз, вели дека неговата екипа е самоуверена и не сака да чека уште 40 години за африкански тим да блесне на светската сцена.