Советот на амбасадори, во кој се здружени повеќе поранешни дипломати од земјава, изрази загриженост за изјавата на еврокомесарот Вархеји дека постои можност Северна Македонија и Албанија да бидат поделени во евроинтегративниот процес ако земјава не ги надмине спорните прашања со Бугарија. Дипломатите ги повикуваат комесарот за проширување и неговата матична земја, како и лидерите на другите земји членки на Унијата да вложуваат максимални напори оваа година конечно да се одржи меѓувладината конференција и земјата да зачекори кон побрзо интегрирање во ЕУ.
„Советот на амбасадори не верува дека изнесениот условен став на комесарот Вархеји може да биде и став на Унијата. По оваа проблематика пред две години негативно се изјаснија некои земји членки на Унијата и не веруваме дека постојат сериозни причини ЕУ да го промени ставот“,
се наведува во соопштението.
Советот на амбасадори смета дека прогресот кон полноправното членство во Унијата на земја кандидат не смее да биде во заложништво на ветото на една земја членка, кога се однесува на билатералните нерешени прашања.
Од Советот на амбасадори додаваат дека реализирањето на таквата можна опција ќе даде негативни импликации за земјата и за регионот, ќе го зголеми степенот на евроскептицизмот и песимизмот кај граѓаните и непотребно ќе го оддолжи патот на Република Северна Македонија кон полноправното членство во Унијата.
Вчера и новинарот на „Волстрит џурнал“, Лоренс Норман, реагираше на Твитер на изјавата на Вархеји со тврдење дека извори од ЕУ велат дека разделување на процесите не се планираат.