Советот на амбасадори, во кој се обединети повеќе поранешни дипломати, денеска предупреди дека „недемократските тези и популистички изјави и услови може да го отежнат стартот на преговорите со ЕУ“.
Советот е „одлучно против настапите“ на одредени политички челници во предвечерјето на стартот на преговори за нова влада. Повикува и новата власт, која и да биде таа, брзо да се зафати со очекуваните реформи.
„Од првите денови на август кога започнува постапката за формирање влада, граѓаните ќе очекуваат одлуката за учество да ја донесат партии кои ќе бидат цврсто определени за ефикасно и чесно справување со предизвиците кои се пред нас, посебно во борбата против пандемијата на коронавирусот. Определбата на новата влада мора да биде бескомпромисната борба против корупцијата, конечно реформи кои ќе донесат владеење на правото и целосна подготовка за евроинтегративните процеси“,
се вели во соопштението.