Првиот човек на Синдикатот, Јаким Неделков кажа дека ќе бараат средба со предлагачот на законот, односно со Министерството за информатичко општество и администрација, а доколку не остварат средба, како што рече, СОНК ќе преземе активности со цел да го изрази незадоволството
Синдикатот за образование, наука и култура (СОНК) го оцени како дискриминирачки и противуставен нацрт-законот за плати во јавниот сектор, кој, според Синдикатот, не само што го ограничува учеството на синдикатите во носењето на одлуките на Владата, туку и ја елиминира можноста за уредување на платите и надоместоците со колективните договори.
„Утврдувањето на исплатата на дополнителната компонента на плата и надоместоци на плата ќе биде обезбедена и ќе се исплаќа доколку буџетот обезбеди средства. Дали тоа значи дека ако ние работиме затоа што е предвидено со закон, во еден момент некој оцени дека во буџетот нема средства, претпоставувам тоа е министерот за финансии и министерот на ресорот, тогаш тоа ние што сме го работеле нема да се исплати? Дефинитивно, спротивно на уставните одредби“,
изјави претседателот на СОНК, Јаким Неделков на денешната прес-конференција.
Со овој закон, додава Неделков, платите и надоместоците може да бидат ограничени, а ако се направи проценка оти Буџетот нема средства или ако се утврди дека државата има приоритет на други дејности, може да дојде и до намалување на платите. Во тој случај, вели тој, ниту работниците ниту синдикатите ќе имаат какво било влијание.
Неделков додаде дека во случај предлог-законот да биде усвоен, за одреден временски период би се изедначиле најниските плати со највисоките.
„Со оваа методологија со секое зголемување на минималната плата ќе се коригираат платите во јавниот сектор каде минималната плата ќе биде основица за пресметка на плата што е добро и на неа ќе се додадат бодови по работно место, или со други зборови, тоа би значело дека линеарно би се зголемиле платите во јавниот сектор. Тоа значи дека од најниската работна позиција со најмлаку сложеност на работно место до највисоката позиција со најмногу сложеност ќе имаат лиенарно зголемување. Доколку овој закон помине тогаш за одреден временски период би се изедначиле платите на најниските работни места со највисоките според сложеност. Никаде во светот немаме линеарно зголемуваење од оваа причина, секогаш е процентуално“,
појасни Неделков.
Тој додаде дека Синдикатот ќе бара средба со предлагачот на законот, односно со Министерството за информатичко општество и администрација, а доколку не остварат средба, како што рече, СОНК ќе преземе активности со цел да го изрази незадоволството.