На средбата се дискутирало за барањето за намалување на бројот на предметите од државната матура од четири до два
Очекуваме и бараме поддршка од сите пратеници и сите политички партии за нашите барања во врска со државната матура, затоа што овие барања не смеат да бидат политизирани, изјави денеска претседателот на Сојузот на средношколци Бленди Ходаи по состанокот со пратеничката група на ВМРО-ДПМНЕ.
Како што информира Ходаи, Генералното собрание на Сојузот на средношколци, на состанок што ќе се одржи попладнево, ќе одлучи дали ќе бојкотираат или протестираат во текот на наредните денови. Сепак, како што додаде, во понеделник нема да се вклучат во наставата, пренесува МИА.
„Тоа што го знам е дека во понеделник сигурно дека нема пак да се вклучиме во настава, затоа што матурантите низ целата држава се фрустрирани и ние не можеме да носиме одлуки против нивниот интерес“,
додаде Ходаи.
На средбата со групата на пратеници на ВМРО-ДПМНЕ, се дискутирало за барањето на Сојузот за државната матура, поточно за намалување на бројот на предметите од четири до два.
Ходаи потсети дека во четврток доставиле писмо за поддршка до сите пратеници во Собранието и како што рече, и наредниве денови ќе бараат поддршка за нивните барања да бидат дискутирани на јавна дебата во Собранието.