Министерката за образование и наука Мила Царовска денеска повтори дека годинава нема да има намалување на предметите за државна матура, како што бараат дел од средношколците што ја бојкотираат наставата.
Царовска нагласи дека концепцијата за матура е донесена на почетокот на годината и оти исклучувањето на одредени предмети би ја нарушила целата концепција.
Досега 15 илјади ученици се пријавиле за полагање матура, што, според Царовска, укажува дека најголем дел се подготвуваат за матура.
Матурата, како што посочи таа, е законска обврска и важна е за запишување на средношколците не само на домашните факултети, туку и на европските и светските високообразовни институции.
„Минатата година бевме негативен пример и нашата земја остана како изолирана затоа што не овозможи полагање на матура. Многу наши ученици извисија од можноста да се запишат на одредени светски и европски универзитети. Токму затоа сакаме секое дете да има можност да ги оствари своите цели“,
рече Царовска, одговарајќи на новинарско прашање.
Царовска посочи дека од следната година се планира да стартува нов, современ модел на државна матура за што, како што вели, е договорено да се формира работна група во која ќе учествуваат и претставници на средношколците.