Бојкотот на наставата е оправдан бидејќи Сојузот на средношколци не се залага за откажување на матурата, туку за нејзино изменување за оваа учебна година, велат од Сојузот како одговор на изјавите на министерката за образование и наука Мила Царовска.
Велат дека се согласуваат дека државната матура е право на избор и тоа право е неприкосновено и дека ја полагаат ученици што сакаат да го продолжат своето образование.
Но, во однос на тоа дека над 14 илјади матуранти веќе се пријавиле во декември да ја полагаат државната матура, Сојузот во реакцијата посочува дека во декември матурантите не биле сигурни дали воопшто ќе се одржи матурата.
„Имаше матуранти кои бараа нејзино откажување и затоа сите матуранти ги пријавија испитите, не сакајќи да се коцкаат со сопствената образовна иднина. Така што, аргументот дека учениците во декември го оствариле своето право врз основа на личен избор не е баш најдобар“,
наведува Сојузот.
Во врска со предложените измени на концептот за матура, кои според МОН ќе важат за наредната генерација матуранти, се целосно разумни за Сојузот зашто ја зачувуваат сериозноста на образовниот процес, а истовремено и интересот на учениците со оглед на, како што велат, (не)квалитетот на наставата од далечина.
Од Сојузот додаваат дека нивни претставници биле поканети и прифатиле учество во работна група за новиот концепт за матура, кој би се применувал од идната учебна година.
„Секоја комуникација на Сојузот со институциите има една цел – градење подобар образовен процес“,
велат од Сојузот и апелираат до институциите да ги прифатат нивните барања за намалување на бројот на предмети на државната матура од четири (три екстерни и еден интерен) на два предмета – мајчин јазик (македонски, албански или турски) и втор предмет по избор на матуртнтот од областа што планира да ја студира.
Бојкотот на наставата го почнаа во четвртокот, на првиот ден од второто полугодие. Претседателот на Сојузот, Бленди Ходаи, изјави дека ќе бојкотираат една недела, а ќе одлучат дополнително за следните чекори и дали ќе организираат протест.