По посетата во Бугарија и средбите со бугарскиот државен врв, еврокомесарот Оливер Вархеји на Твитер напиша дека по три недели повторно ќе се врати во Софија за да најде заеднички прифатливо решение за отворање на пристапните преговори со Северна Македонија во јуни
Во рок од три недели Софија да се согласи за почеток на преговарачкиот процес со Скопје – ова е очекувањето на еврокомесарот за проширување и добрососедска политика Оливер Вархеји по средбата со бугарскиот државен врв – претседателот Румен Радев, премиерот Кирил Петков и шефицата на бугарската дипломатија Теодора Генчовска.
По посетата во Бугарија, еврокомесарот Вархеји на Твитер напиша дека по три недели повторно ќе се врати во Софија за да најде заеднички прифатливо решение за отворање на пристапните преговори со Северна Македонија во јуни.
„За три недели ќе се вратам во Софија за да најдеме заеднички јазик и поддршка од Бугарија за започнување на преговарачкиот процес со Република Северна Македонија во јуни“,
пишува еврокомесарот Оливер Вархеји на Твитер по средбата со бугарскиот премиер Петков.
По средбата со бугарскиот претседател Румен Радев, еврокомесарот Вархеји на Твитер напиша дека важноста за стабилност на Западен Балкан нема цена, а оти во тоа значаен придонес ќе има одржувањето на првата меѓувладина конференција со Северна Македонија и Албанија.
„Го ценам отворениот дијалог со бугарскиот претседател Румен Радев. Важноста да имаме стабилен и просперитетен Западен Балкан нема цена. Во овој контекст, значаен придонес би бил одржувањето на првата меѓувладина конференција со Северна Македонија и Албанија. Треба да работиме на ова заедно“,
стои во твитер-објавата на Вархеји по средбата со претседателот на Бугарија, Румен Радев.
По средбата со шефицата на бугарската дипломатија Теодора Генчовска, еврокомесарот Вархеји напиша дека се работи на заемно прифатливо решение за отпочнување на преговорите со Северна Македонија и Албанија со одржување на меѓувладина конференција во јуни.
„Интензивна средба со министерката Теодора Генчовска во Софија. Разговаравме за директните последици од војната во Украина за Западен Балкан и пошироко. Работиме на заемно прифатливо решение за да можеме да ги започнеме преговорите со РС Македонија и Албанија со одржување на меѓувладина конференција во јуни“,
пишува еврокомесарот Вархеји на Твитер по средбата со бугарската министерка за надворешни работи Генчовска.